位於營地大街的明記「碟仔糕」營業近五十載，將於農曆年底榮休，一眾街坊大嘆不捨。1967年開業，即「一二．三事件」後一年，與香港六七暴動、TVB開台同年。「全都有紀錄。我三十五歲做到今年八十五歲，所以我的心態是要做足五十年。」天鴿風災，店內水浸，雪櫃都壞了，距離「五十年」雖然只剩下幾個月，鄺伯仍堅持要買新雪櫃繼續營業，誓要做夠「五十年」。「我做人就係咁，唔可以放棄嘅！」
自創碟仔糕 歡迎競爭 不喜量產
「用雪糕材料做，唔會溶，三十幾度熱天都唔會溶，但入口就溶了。」直到今日，鄺伯說起自己研創的點心仍滿臉自豪。本身會做雪糕，開業後店內好一段時間亦有賣雪糕，及後鄺伯自創出口感爽滑的「碟仔糕」。點心大受歡迎，自然有不少同類商品在市面出現，但鄺伯無懼競爭。「我仲開心，多人抄我仲開心，因為有得比對。等於你去跑步，一個人跑步沒意思，多人跑步才有意思，才有比較。越多人學我，我仲開心。唔會影響你的，相反，仲賣多啲。好多人唔明白呢個道理。人多跑步，起勁啲。」
明記老闆鄺伯
說起當年開店，鄺伯坦言因為勝在不用請伙記，靠自己已可做得到。「五十年都冇請過伙記。兩個做。」又指，今時今日超市、便利店到處皆是，士多式微，自己就因品牌才可堅持至今。多年來，不少人曾接觸鄺伯，希望將「碟仔糕」「搞大嚟做」，但鄺伯都婉拒。「點解人手做嗰件嘢好食過機械式？點解啲人鐘意竹昇麵，唔係機製麵？機器操作係沒變動，人有感覺嘅變動，你睇佢坐住支竹，佢有感覺，感覺個麵粉嘅韌度，機器有冇感覺？做呢啲都一樣。機器代替唔到。得，做出嚟效果唔係一樣。好多人唔明白。覺得機器，大批做嘛，咁收得。但咁就冇呢個效果咁靚，走曬樣架喇喎。」但會賺更多？「呢啲人手操作嘅嘢，係唔到你貪心。如果靠人手操作，你貪心，做嗰件嘢係有失水準。」
「呢樣嘢係我自己創，由頭帶到尾都係我做，可以講句冇變樣。有啲人由細食到大，做到變媽媽帶下一代嚟，一直都係一樣。由自己研究做出嚟，到今時今日都係我經手，冇轉過手，五十年不變。」
年紀漸長 榮休享福
每日早上七時起身煮糕，「天冷就慘啲，不過天冷冇咁辛苦，煮嗰時冇咁熱。天熱好辛苦，企埋爐頭差成八九度。」每款每日限定三百件，售完即止。「後生嗰時做四百五十件，而家少咗了，因為抽起個罉嗰時要用力，嗰道力度唔係講玩。」年紀漸大，鄺伯表示自己身體已大不如前，去年更試過入院留醫。「個仔見我血壓高，又做到咁大年紀，就（勸我）唔好喇，但我（當時）心願未達到，我要做夠五十年。」
他坦言，擔心退休會悶，但也希望休息。「我退休就八十六了。人生有幾多個十年？做咗幾多個十年，享受有冇幾個十年？十年後，九十五了，冇幾多個十年了，有一個十年都超額了。」不少街坊得知明記將退休都大嘆不捨。「佢做咗好多年喇……我揹緊書包已經喺度食。我而家六十了。」有人問：兒子不接手嗎？鄺伯坦言廚房工作辛苦。「佢有佢嘅工作……佢讀咁多書，呢啲手作嘢，讀咁多書係做電腦嘅，做呢啲手作嘢？對住個爐好熱㗎……好辛苦㗎。」
有甚麼想跟客人說的嗎？「好唔捨得。因為有咁長時間，有感情。啲客仔咁支持，而且咁欣賞，支持咁耐，嗰個感情好深厚，下一代都鐘意食。」
天鴿風災後，店內亦受水浸影響。鄺伯買了新雪櫃重新營業，堅持做夠五十年。
