一人一句 施政前瞻

2013-11-08 施政前瞻?遠景何處! 每週專題

文:論盡

時間:2013年11月8日 10:10

行政長官崔世安任內最後一份施政報告將於十一月十二日發表,澳門市民政府過去一年的成績?而市民對未來一年特區政府的施政又有甚麼期望?

程同學(中學生)

其實都無咩期望,唯一就望吓佢會派幾多錢囉。

訂閱每月紙本

關小姐(文員)

主要想睇下政府對弱勢人士有咩補助,以及想佢起多啲公屋。

黃先生(博彩從業員)

期望佢派多啲錢囉。

陳女士(家庭主婦)

希望政府除咗派錢之外,仲要識照顧我地啲窮人。

Kate(博彩從業員)

想知道政府會唔會立法禁止啲外勞嚟澳門做嘢。

陳先生(巴士司機)

都無咩好期望架啦,年年都係派錢,淨係識派錢,個政府就淨係叻吹水,其他嘢又唔見佢做。

陳同學(大學生)

希望政府唔好淨係識派錢,要將啲錢放番係民生嗰度,例如搞下巴士啦,起多啲公屋啦,因為依加啲私樓真係好鬼貴。

徐小姐(文員)

希望政府改善下交通囉,日日放工時間南灣都塞車塞成半個鐘。

A先生(公務員)

好老實啊,政府咁多年嘅施政報告都係得個講字,又唔見佢點履行過佢嘅承諾喎。不過都啱嘅,啲官都係咁架啦。我老細都差唔多,做嘅、捱嘅就由得班細嘅做,大嘅就坐係冷氣房UN UN 腳等收工。仲點會望呢個政府會為市民做嘢啊。

Andrew(退休人士)

依加個政府做得唔錯啊!又有錢派,又有退休金,又有生果金。我梗係期望佢推出多啲福利,等我地多個錢洗下,唔使憂柴憂米啊。

B先生

無期望喎,不嬲都對政府無乜期望。

Thomas(大學生)

首先希望政府搞掂澳門嘅交通問題啦,其次係起多啲公屋比年青人,仲要起多啲醫院,澳門咁多人,得三間醫院點夠啊?

袁小姐(教師)

我作為老師,我期望政府可以擺多啲資源落去教育嗰度。雖然依家有十五年免費教育又有私框,但係好多學校嘅資源都係唔足夠,而老師就愈做愈辛苦。其次係醫療方面,希望政府可以改善下山頂醫院嘅質素,同埋起多啲醫院,等我地有病嗰陣都唔使等得咁辛苦。

Jacky(大學生)

無希望就無失望,所以我都無乜期望。

王女士(博彩從業員)

希望政府唔好畀賭場輸入外勞,等我地可以安心打埋呢幾年工,安心退休。然後希望賭場可以全面禁煙,依家係賭場做嘢真係辛苦,又要吸二手煙,搞到我地成日都唔舒服。