Kimchi的一部分應援物收藏。（相片：Kimchi）
其實開頭係無意間見到《大叔的愛》呢套劇名，由於好奇心驅使先去搜尋，之後就因為睇咗《大叔的愛》入左坑。不過我係第一次追星，對於呢樣嘢根本都唔熟悉，無乜經驗，我淨係知我鍾意佢哋，都想見到佢哋可以努力做自己想做嘅事。後來都慢慢留意到其他鏡仔，因為咁而愛上咗MIRROR 呢個團體，佢哋真係帶咗好多快樂俾我。
我入咗呢個追星圈之後，除咗關注鏡仔們嘅動向，都因為有「鏡粉谷」嘅存在大部份鏡粉都好友善，會互相鼓勵，交流吓追星歷程、心得，齊齊開心追星，我亦都因為咁而識咗唔少鏡粉朋友。
開始追星以前，星期六日因為太得閒，都會踎喺屋企根本冇乜嘢做，都幾無聊。但係自從追咗星之後，個個星期六日都有好多應援物攞，雖然會花費時間，但對於我來講都未嘗係一件唔好嘅事，好開心可以拎到咁多靚靚應援物可以收藏，同埋儲儲下啲靚靚應援物，其實又都真係幾有成就感，又可以周圍去，起碼都唔會咁無聊。亦因為想宣傳自己嘅偶像，都會自己郁手去研究吓應援有關嘅嘢，比如點樣做比較靚，或者係排版，或者係手繪，研究下點樣畫會好睇啲，可能不知不覺中自己嘅美感同畫功都進步咗。
如果連自己想要乜都唔知，人生將會變得好悲哀
但係對於現時嚟講，大部分人對於追星呢個字，都先入為主咁覺得係一件好嘥錢又冇回報嘅事，會話追星係愚蠢嘅一件事。但係作為粉絲嘅角度來講，我睇到嘅係呢個物質橫流，追逐名利權勢嘅社會中，好多人都盲目咁追求一啲嘢，或者係錢，都係尋求物質上嘅滿足，但冇諗過其實自己真正想要嘅係乜。
Kimchi的一部分應援物收藏。（相片：Kimchi）
對於我嚟講，連自己想要乜都唔知，就好似唔係為自己而活咁，其實都係一件好悲哀嘅事，亦都好痛苦。係一個咁樣嘅社會現象下，「偶像」呢一啲人反而算係畀我，或者係追星嘅一班粉絲們，係呢個世界上可以有返一個心靈寄託，起碼呢個世界上都仲有嘢值得我在意。雖然咁樣諗係悲觀咗啲，但係對於作為學生嘅我嚟講，追星呢件人哋唔睇好嘅事，反而喺我度，見到偶像佢哋會不斷挑戰自己，或者係挑戰作曲，或者係挑戰填詞，或者係挑戰跳唱，或者會去演戲，或者努力嘗試透過歌曲，去表達自己真正嘅想法，見到佢哋咁努力係舞台上發光發熱，只係為咗同世界講佢哋有能力，可以做自己想做嘅事，成為自己想成為嘅人。
見到咁努力嘅鏡仔們，真心好charm。佢哋努力嘅過程亦更加鼓勵咗我，會去更加努力咁去做自己想做嘅事，成為自己想做嘅人，即使遭受外界嘅質疑同批評，都嘗試保持自己嘅初心，正如《熔爐》中所講：「我們一路奮戰，不是為了改變世界，而是為了不讓世界改變我們。」
