【議會花絮】話說新財爺今日首戰立法會，一出場就遇上最棘手的《勞工法》修訂法案，注定頭痕！政府建議將打工仔被無理解僱的補償由現時最高16萬8調升至24萬，無論做幾耐年資都只賠12倍，封頂機制不但勞工界不賣帳，連官委議員馮志強亦加入戰團，滔滔不絕替商界大抱不平：澳門最有良心就喺生意佬！
他稱，澳門很多中小企的營商環境都不及從前，不少打工仔人工甚至好過做老闆。「爭取工人權益是應該，但亦要體諒中小企經營有困難！有生意做，邊有老闆肯炒伙記魷魚？唔好咁肯定全部都喺不仁既老闆。所有公益事業都係生意佬做，實情最有良心既就係生意佬！」
馮強越講越興起，連負責引介法案的新財爺梁維特都「躺著也中槍」，他說︰「我諗司長曾經都做過老闆，亦都未必做得咁光彩，未必做得風生水起，否則都唔會選擇做司長啦！呢個係真話！做司長廿萬人工都無(編註：司長月薪+交際費+津貼月收接近20萬，1年14個月糧) ，做生意做得好，你估仲得掂啊？」
接著馮強由無理解僱「吹」去交通問題，再「吹」到玩百家樂，連立會「一哥」賀一誠都頂唔順，著他回到法案的討論，「你留返下次專場先再講啦……今日係直播架……」惹得整個立法會哄堂大笑。
