政府決定清拆路環荔枝碗11座船廠，社會批評聲浪不斷。當局一直強調船廠是危樓，而行政長官崔世安亦先後兩次強調荔枝碗規劃首重公共安全，但當局卻一直未有公開驗樓報告來說明船廠「非拆不可」。時事評論員黃東認為，政府一直無法交出有公信力的驗樓報告，並利用語言偽術來誤導市民，令市民誤信船廠現狀對公共安全構成威脅。他認為，當局應立即煞停清拆行動，並公佈驗樓報告及荔枝碗原來規劃的情況，「如果佢有有力嘅證據，應該公諸於世，但到而家都係度迴避，攞唔出資料，資訊愈少，愈係隱藏著重大危機。」
黃東質疑，2009年政府收回荔枝碗合興船廠至今已有7至8年，而整個荔枝碗村從2006年造船業式微至今亦有十多年，「究竟政府係度做過乜嘢？無！連村民都話見唔到有政府人員嚟調查研究，咁又點可能交得出呢份驗樓報告？」他亦指，普羅大眾對荔枝碗船廠不熟悉，而政府亦一直未能交出強而有力的驗樓報告，只能利用語言偽術來誤導市民，令公眾覺得荔枝碗船廠十分危險。
「官民心態嘅差別有幾大，佢覺得所有嘢都唔重要，全部都可以拆哂，一句無地就可以解釋到一切，一句發展呢啲嘢就全部阻地方。」他認為，政府與民間均要反思官民心態之間的差別，「當佢覺得所有嘢都唔重要嘅時候，我哋可能覺得一磚一瓦都係寶。兩者都應該要反思，唔係政府話為你好，為你嘅安全，就一定啱。大家一定唔可以忽視呢個誤導性，唔可以令主導權、話語權掌握係佢哋手上，要將荔枝碗嘅事宣傳俾更多人知道。」
政府態度有古怪 黃：荔枝碗失守威脅路環命運
坊間一直憂慮，一旦荔枝碗被夷為平地，就可能會成為地產商的囊中物。黃東認為，按照過往經驗分析，政府對於荔枝碗船廠的態度「一定有古怪」，認為市民理應警惕，「按而家嘅發展趨勢，好大機會政府會拆咗佢變成爛地先，然後丟淡件事。之後就可以去做一啲關於商業行為嘅事，最終呢一片華南最後嘅寶地淹沒咗。市民當然會覺得心痛，但政府唔會覺得可惜。」
黃東亦認為，荔枝碗船廠事件對路環以至本澳城市規劃亦帶來嚴重影響。整個荔枝碗片區涉及數萬平方米的土地，亦是有人居住活動的社區，更是路環的有機組成部分。他憂慮在未有總體城規的情況下，茂然清拆如此廣大面積的船廠區域，除了會影響荔枝碗村外，亦會對路環這個唯一的市肺，以至對全澳市民帶來威脅，「影響咗荔枝碗，一級級影響落嚟，實際嘅破壞將會去到更嚴重嘅地步。」
黃東：崔世安應負最大責任 應連同兩司四局公開回應事件
行政長官崔世安先後兩次回應荔枝碗船廠時均提到「自己並非建築專業，無法將荔枝碗船廠界定為危樓。」黃東認為，連坊間的建築專業人士均指出荔枝碗船廠結構可以修復、不應全盤清拆時，「點解都唔去聽？點解咁強硬？邊個會信背後無問題、無鬼？」他認為，崔世安應為事件負上最大責任，因特首完全有能力去制止事件惡化下去，「你仲想拖到幾時？」
他亦認為，特首連帶社會文化、運輸工務兩名司長，以及有份參與規劃的海事、工務、文化、旅遊四名局長均應，主動公開交代涉及荔枝碗船廠及規劃的所有資料，以回應社會質疑，「如果真係咁危險，分分鐘會死人，危及公共安全，咁咪更加要儘快回應質疑，呢個責任所有官員都無法迴避。」
