【第一現場】特首候選人崔世安首場「公聽會」，全場座無虛席！好墟冚！連新澳門學社理事長蘇嘉豪都被吸引過黎，想當面向安安陳情，同行既仲有澳門良心成員黃健朗，點知兩人遠遠被競選辦職員同保安快速攔截，食左閉門羹！
蘇嘉豪同黃健朗被競選辦職員同保安快速攔截，食左閉門羹
職員話「要抽籤同埋攞飛先可以入」，蘇嘉豪就指好多人都唔知有公聽會，睇競選辦網站同微信都唔見有報名？職員只係答早幾日已經登左報紙云云，蘇再要求即時報名也被回絕，「如果入邊有位都會比你地入去，但係依加入邊已經坐滿人，實在無辦法比你地入去」。雙方理論了大約半小時，現場變得有啲僵。
期間記者觀察到有參加者同樣被攔截，其中一個正打電話既男人好勞氣咁話：「喂！乜原來要飛先入得架咩？無飛咁我走架啦！」兩分鐘後，一名手持一大叠入場券的男子出來派飛，佢地先可以順利進場。
公聽會結束後，蘇嘉豪同黃健朗係世貿中心門外舉起「我要有權選特首」同「民間公投」標語牌，多數參加者都無沒有理會，匆匆而過。現場見到安安座駕等候主人，但過左大家約半粒鐘都唔見佢落樓，蘇嘉豪想再黎一次「世紀握手」、當面向安安表達普選訴求都無機會。
蘇嘉豪同黃健朗係世貿中心門外舉起「我要有權選特首」同「民間公投」標語牌
事後蘇嘉豪批評競選辦連公聽會都要搞到「咁閃縮！」競選網站及微信均沒有任何報名方法，只在日程中寫上「公聽會」三個字，做法與過往五年施政一樣不透明，未能貫徹競選口號「聽民意」嘅承諾。「競選辦應該搞多幾場公聽會，搵啲大啲嘅場地等多啲人可以參與，唔好只係『偏聽』讚美嘅聲音。」
記者之後翻查競選辦兩個新媒體平台，的確無通知報名，只係8月17、18號某幾份中文報章（不是全部）刋登既政綱最下面個欄有通知，但報名日期只有短短三日（17號至19號）。記者亦嘗試問左十位市民，以及一啲留意時事的社會人士，他們十個有九個都話唔多知，有啲呻笨話「走左寶」、有啲就投訴「花左咁多錢印宣傳單章，插到家家戶戶都係，其實佢想人知道總係有辦法！」不少市民都建議不如多開幾場，反正有心唔怕遲！辦法總比困難多！
