崔世安近日頻頻落區，日日有座談會，推銷政綱，認真出盡力！今日又同21個青年團體領袖座談，街記、工記、婦聯、青聯、學聯、新青協、童軍總會，仲有福建、潮州、江門青年社團等等濟濟一堂，同年青人親切交流，好不熱鬧！但，數渾都係愛國愛澳陣營，「聽民意」淨係聽埋一邊，會唔會怕俾人話「偏聽」？ 唔敢接受挑戰？
會上青年才俊踴躍提問，有關心人才培訓、競爭力、支援青年創業，亦有反映買難等問題。青聯理事長陳秀釵就直接了當得多，向崔世安提出兩點「請求」，一起圖書館，二建青年大樓「俾青年社團用作接待」，此言一出，旁觀者側目。崔世安就好識做，讚佢構思幾好！「依加啲業主唔係加租，而係唔租比你地，我地會研究係新區興建青年大樓。」咦，乜都得特首真係名不虛傳？
