拾海星的愛心僱主

011 回家 紙本月刊

文:採訪:清保涼、小花

網址:https://aamacau.com/?p=7177

時間:2014年03月13日 14:14

人稱「魷魚」的劉龍池,從事搬運行業,旗下的搬運公司,曾聘用過百名更生人士,佔總員工數目約三分一。他指目前本澳僱主聘請更生人士的意慾都不高,若以一至十分來打分,僱主普遍接受程度可能只得四分。

DSC_0706

自己走過的無助

「我入過去五次,喺裡面成三十幾年,十八歲開始入去。七幾年出嚟,當時做過木工、油漆、看更等工作,但當老闆知道你坐過監,就唔鍾意,始終都避忌有戒心。自己試過很多次,出到嚟無人幫,很快又要入番去。很多地方都唔請,但呢一關過唔到就會又入番去。我好彩,最後撞番啲朋友,朋友請我,叫我搵人搬運。覺得我有責任心,之後陸續很多老闆叫我搵人。我就諗,若果我有能力,一定幫番佢地!」今年六十五歲的魷魚,曾經也是過來人,所以非常體會更生人士「需要一個機會」的重要性。

魷魚相信,自己公司的工種多樣,具技能、但不會太辛苦,涉及會展佈置等工作,有利更生人士「騎牛搵馬」。「騎牛搵馬,咁佢地容易搵到更合適的工作,做慣了的工作會較為專心。若出到嚟無人請,入錯行又很快學打回原形了。只要有份工做住,慢慢再找更好的。若他們轉到工,我會由得他們。我這裡是讓他們過渡的,一旦他們又無嘢做,或做得唔開心,又可以番嚟。」

他形容自己不單是更生人士員工的上司和朋友,「有時候做埋老竇,簡直好似湊仔咁,他們的家人,一見到我就講多謝的了。」就像保姆一樣,他會親自督促更生人士的工作。「老闆都指定要我喺度,這樣他們會聽話啲,有時都好勞氣的。」遇到剛出獄的更生人士,若見到他們有需要,魷魚說自己會亳不猶豫幫助他們周轉。「很多剛出嚟時,真係好徬徨的。所以剛入職,都可以先借糧。若他們表現好,收工或每隔一段時間,我會帶他們去食飯奬勵他們。做熟才可自力更生,起碼要幾個月,人定啲,開夠工都有過萬元一個月的,有時還有加班。」

若員工在工作時出現不良狀態(例如濫藥),魷魚會立即要求他收工,然後跟他輔導。「我會勸佢一係戒甩再番嚟開工,唔好影響大家。」剛才慈祥的「保姆」頓時變得莊嚴起來。

「他們要麼盡心盡力去做,要麼就不做,都有責任心的。若他們答應了做,就會講義氣,無論幾辛苦都跟你捱埋那一天。」

縱然魷魚仍見不少更生人士抵受不住誘惑,走回舊路,叫人心痛、惋惜,但他仍堅信:「救得一個得一個」。

「有時他們食番果啲嘢,吸毒始終係心癮,一食番就會同我講。我都會勸他們,因為一食番就無心機工作,我不會炒他們,他們卻會自動走。我都會說戒掉了,喜歡就隨時回來。」

魷魚坦言,即使有僱主願意聘請更生人士,但不代表他們對更生人士的工作表現就會充份包容;相反,僱主更有可能「一朝被蛇咬十年怕草繩」,因個別人士的表現欠佳,就從此標籤更生人士,不再給予更生人士機會。「心理上僱主一般會心諗,我幫你,你仲唔做嘢!若有爭論,我會慢慢跟他們傾,但其他僱主就未必。」而針對僱主對更生人士的接納度普遍性低,魷魚認為政府或社團應該主動舉辦分享會或座談會,讓僱主更好地了解更生人士,從而促進兩者的合作機會;甚至可以要求受津貼的企業或團體,預留一定名額的職位給予更生人士,帶頭鼓勵更生人士重返社會。他笑道:「應該同啲僱主上上課,跟他們傾傾,教育一下。」

最後,魷魚勉勵更生人士要自重、自強。

訂閱每月紙本

「努力搵錢,唔好比人睇衰,自己受左咁苦先出嚟,要好好珍惜!」