最新公佈的「電子消費優惠計劃優化方案」被視為是聽從民意之舉，一下子擊退早前的如潮般的惡評。但有意見認為政府是次不過是重施故技，即萬試萬靈的「派錢」招數，惟澳門人最受落就是「派錢入袋」。澳門大學政府與公共行政學系副教授余永逸認為，派錢紓困能解一時之需，但長遠來看當局還需考慮如何善用公帑及合理分配資源，讓有需要的人得到更多援助，特別是在此經濟尚未復甦之時。談及這次優惠計劃的優化貌似是政府向民意「跪低」，他則表示，政府管治缺乏宏觀思維，在面對問題時難回應社會所需。
至於有團體或借優化方案邀功為選舉造勢，余永逸相信並非全因選舉，但若參與選舉年的議員可以帶動社會討論公帑善用相關議題，亦能對社會發展有正面影響；他又期望議員們在此後亦能同樣重視公帑的善用。
余永逸認為是次的優化計劃基本回應民間訴求：有直接津貼及資助；簡化獲得優惠的方式；外僱、非本地學生等不列入優惠範圍等。從紓困角度來講，有經濟援助及津貼是需要的。他表示為紓疫情之困，不少國家採取「派錢」，此舉並非澳門獨有，又預計「可能喺未來一段時間，政府都無可避免需要去派」，因為無法預計經濟狀況何時見明顯好轉。
派錢解決所有問題？余：政府派錢解市民不滿 積習短期內難改
但從宏觀層面去看，「環境好嘅時候又派，環境唔好嘅時候又派，咁我哋真係任何時候都喺度派錢。咁呢一個係咪一個好嘅方法呢？」他表示難以在疫情下討論「派錢」是否恰當，坦言今年失業率、就業不足率、入息中位數等都較去年差，「你冇理由舊年都派緊錢、消費卡嘅時候今年你唔派……用返當年嘅講法，現金分享係政府有錢先派、冇錢就唔派，呢個係合理嘅；但實際上大家都知道，現金分享唔止係現金分享，而係政府好多嘢做唔到而透過派錢紓緩市民嘅不滿……現階段來講要改個方向就冇乜可能，唔可以太快或者唔可以改得太多。」
是否以後派錢就可以解決所有問題？但還可以派多久？余永逸則認為是次引發的爭論正是為日後如何善用公帑、合理分配社會資源凝聚共識作鋪墊。「第一我哋會知道政府嘅資源係有限，即係我哋會知道政府係需要更有效益咁去利用公共資源，呢個必然大家會明白；第二，基於政府資源有限，政府資源嘅運用應該要更精準咁協作更有需要嘅人，而唔係所謂人人一樣嘅福利政策……唔係好似以前咁人人有份我哋就咩都唔理，咁嘅做法我覺得已經係一個進步。」
「因為我哋過去十幾廿年都係咁樣派，幾時派幾時唔派呢個應該係市民共識。問題係大家要開始去凝聚個共識或者諗法，究竟大概係乜嘢狀況我哋要派多啲，咩狀況某些人得多啲某些人少啲，呢個係開始社會要有一個方向性。」余永逸期望未來澳門的福利政策可以做到精準支援，但是次引起討論並非代表日後派錢多少或派予誰人不會惹爭議，「即係大家覺得（將來的政策）複雜唔明，咁咪不如唔好煩，維持原判即係話人人都咁多。澳門社會就最好咩呢，唔係叫人人平等，而係人人一樣、個個一樣。」
政府「跪低」實為無管治方針及視野回應社會所需
談及這次優惠計劃的優化貌似是政府向民意「跪低」，余永逸則表示回顧過去幾屆政府的做法，「跪低」並不少見。「其實每一屆政府你見得到即係市民一走出來一嘈，有一定嘅壓力咁政府就驚啦，咁跟住呢就會退…..好多人畀壓力政府，而佢（政府）又覺得佢冇辦法去化解，又或者亦都唔值得用好大嘅力去壓呢啲反對聲音，咁佢咪退囉。呢個其實係一如既往，澳門政府回應都係咁……新一屆政府都冇真係好明顯嘅變化囉。」
他認為這樣的管治缺乏宏觀思維。「凈係睇住我（政府）而家要支援經濟，每件事做未必係錯嘅……但係衍生出來其他嘢佢（政府）冇睇到嘅，咁個政策咪冇高度性囉。而佢過去所做嘅（政策）都係咁。過去嘅（市民反對）成功就係一有反對意見（政府）就收返、唔做，（政府）一夾硬做就知道會出事，呢個係澳門政府慣常用嘅管治手法……但冇管治方針及視野回應社會的不同需要。」
不少社團為選舉「抽水」自詡「成功爭取」余：選舉就會大聲啲
今次的優化方案公佈後，不少團體立馬「邀功」並自詡「成功爭取」，是否借此為今年選舉造勢？余永逸稱：「選舉固然有關係，但我相信未必完全因為選舉。應該咁講，選舉就會大聲啲，冇選舉我諗都會出聲嘅。」他指出原本的優惠計劃推出後社會有較多反對意見，傳統社團及過去比較支持政府的議員只是反映民意，因此而獲得的政治上的支持可理解為獎賞。「當然好多人咁講 ，咁樣係咪好功利？可能係功利，但係政治就係咁樣，唔可以話我無限付出但完全唔講所謂回報，呢個係我為民發聲而得到市民嘅支持，呢個係正常嘅（做法）。」
「我覺得我會期望啲議員除咗為咗選舉之外，可能下一步要去講嘅就係帶動社會凝聚共識，究竟邊啲人多啲（資源）邊啲人少啲，或者點畫條線，會唔會有啲諗法要拋出來，甚至今年選舉年會唔會討論呢樣嘢……其實呢個都係進步來，如果選舉年議員可以帶出新嘅議題，係過去大家都忽視而透過今次疫情認知的，帶出咁樣嘅討論對社會發展、政府管治都有正面影響。雖然成日話批評政府，但同時都協助緊政府點樣釐定新嘅管理方法。」
