坐擁大量批地的財團今次勢估唔到係新《土地法》踢到石頭，一眾官商議員群起攻之、反晒檯，揚言要聯署提案修法。新澳門學社理事長鄭明軒認為，這場角色大逆轉的戲碼反映官商勾結一直存在，支持修法的議員並非與政府打對台，只係計錯數，想不到運輸工務司會企硬依法收回土地，「而家商界嘅想法係，既然有人按照遊戲規則嚟玩，咁我哋（官委議員）就要改遊戲規則啦！」
至於唐唐今日忽然轉軚，將修法說成「釋法」。鄭明軒認為，背後可能有一股力量要求商界轉軚，而事實上「釋法」必須有人到法院申請，唔關立法會事，「若果唐議員覺得呢件事既不合理又不合法，相信佢有責任代表小業主去法院申訴。但如果佢唔會的話，就最好唔好代人哋發言。」
鄭明軒認為，今次修法大戰與《離補法》有一個共通點，就是有權貴在光天化日之下明搶，但這次搶的不是錢，而是利益大過百倍的土地。他警告政府若看不穿商界的企圖，「配合」議員修法，可能要再一次冒「犯眾憎」的危險，「我哋唔係要唯恐天下不亂，但政府要明白，辣㷫市民嘅後果係點。」星期日學社將舉行回歸大遊行，下午兩點祐漢公園集合，他呼籲澳門人上街用腳來表態，守住這條防線，封住修法的「後門」。
