絕育手術於狗會內進行（相片由受訪者提供）
澳門愛護動物協會（ANIMA）日前發出新聞稿，表示「民署和逸園的協議，動物要在60日內，在狗會場地內絕育」、「ANIMA尊重大家達成的協議」，又稱職員ZOE「似乎頑固地不同意ANIMA主席的協議和方向」，並指她「似乎已經離職」。（詳見另稿）
照顧格力犬多時的ZOE則向傳媒現身說出她的版本。她質疑，500多隻格力犬為何需要在60日內全部完成絕育手術，認為現時不少格力犬健康欠佳，絕育並非首要任務，只要在格力犬被領養前完成絕育即可。又認為，現時狗會場地並不適合完成手術的格力犬休養，照顧格力犬的醫護人員亦不足，應放慢絕育格力犬。
另外，民署今日亦已發出新聞稿，表示「並非強制逸園於60日內進行全數絕育」。
絕育太急趕 格力犬欠照顧
照顧格力犬多時的ZOE指出，所謂的「救」格力犬，並非指把格力犬送走就等於是「救」，亦要關注格力犬現在生活的水平是否完善。「主席同我講，如呢兩個月做唔到絕育，呢啲狗兩個月後未必離開到逸園。」她指出，如要在六十日完成五百多隻格力犬的絕育手術，即每日要完成十個手術；過去ANIMA曾有一隻十歲的雄性格力犬，處理絕育連洗牙要四個小時，「現在要八小時完成十隻，根本天方夜譚。」
她又指，短時間內要清潔多個狗欄，地方一定很濕滑，現時的環境亦不適合剛完成絕育手術的格力犬。「佢哋會喺自己個欄疴屎疴尿，床都冇張，即係瞓地下。」「啲狗連床都冇得瞓，瞓喺啲濕咗嘅（地方）污糟水，個傷口……你知母犬要劏肚，傷口會發炎，發炎邊個會處理？冇人答到我。」
她又稱，有獸醫表示，狗隻絕育前有禁食，但沒禁水，「冇禁水嘅情況下，為呢啲狗做絕育，我想問，係咪成個民政總署都喺草菅緊狗命？」直言希望可以幫格力犬出一口氣，「因為佢哋（狗隻）好無辜，佢哋唔識發聲。」
她重申，自己贊成格力犬要做絕育手術，但不認為必須要急趕。「我覺得絕育係必須，但係咪咁急要六十日內做曬？我覺得沒必要。因為每日都有病嘅狗唔舒服要食藥，呢啲先係首要去理。」認為可以先每日為兩隻格力犬進行絕育手術，方便觀察其傷口。「每日十隻，一個星期七十隻，你搵邊個係睇曬嗰七十隻個傷口？每日都去睇有冇流嘢，要唔要抹傷口？」又認為狗伕表現不穩，認為人手不足以應付「一個星期七十隻剛完成手術的格力犬」的照護工作。「可唔可以只要承諾啲狗，日後喺被領養前，一定確保已經絕育。我哋絕對唔畀呢啲被絕育嘅狗被領養，就已經OK？」
望放慢絕育 先關顧病狗
ZOE表示，曾有格力犬不斷流鼻血，最後需要送去狗房，現正逐漸康復，認為照顧病狗比絕育更緊急。（相片由受訪者提供）
ZOE指，現時每隻狗有其獨立狗欄，交配的機會是零，又相信之後格力犬都會被分隔安置，重申希望可以暫緩絕育這批格力犬，又認為應先處理的是犬隻的健康問題，而非絕育。她稱，當初民署接管格力犬時曾指，有十多隻狗有出現健康問題，但照顧格力犬的義工發現其實大部分格力犬都有皮膚問題，「唔係一般搔到好紅，係講緊爛肉。」除此之外還有一部分格力犬有牙齒問題，如發炎、牙石、「中間啲牙嘅窿大到可以伸隻手指入去」等等。
對於民署指，目前完成絕育的十多隻格力犬康復情況良好，ZOE認為，「癒合得好唔好，都係佢講，都入唔到去睇。但我見到嘅嘢並唔係咁。」又表示，絕育手術現時在逸園一房間內進行，而由於逸園沒儀器，儀器就從市政狗房而來，但不清楚為何不在狗房進行絕育。「已經用緊政府資源去安排出面嘅醫生去用。用壞咗邊個畀（負責）？」
對於自己離職，ZOE表示，是因為看到將來如這批格力犬出現問題，自己都是唯一一個可以出來講的人，要幫這些狗平反。
相關報道：【個個洗手】究竟是誰說要60日內絕育500多隻格力犬？
