澳門論壇今早就探討「牛肉乾」加價及修訂《道路交通法》等問題。台上台下一致鬧爆政府政策「離地」，完全不理澳門泊位不足，公交系統欠完善，揸車出行是澳門居民的剛性需求等現實情況，當局一味靠罰，還想大幅調升罰款，如同「打劫」無分別。
有市民反映，現時家庭每月在「牛肉乾」上的開支「千幾蚊實走唔甩」，很配合政府公交優先政策，假日都盡量不揸車，「但唔揸仲死，屋企樓下成兩架車抄牌，我哋唔係想亂泊車，而係無合法車位俾我哋泊。」又批評政府不斷將原本合法車位變成違法泊車，「捐窿捐罅畫晒黃線，咁我哋泊去邊啊？不如搬埋架車上屋企啦！公交又搞唔好，返工時間七點幾，邊個搭到巴士返工啊？實遲到啦！到時又入邊個數？」亦有市民批評，政府對無法無天的違規的士「隻眼開隻眼閉」，卻選擇性懲罰小市民。
電單車從業員協會大會主席李仲森形容，修法建議調升違泊罰款是「強迫性罰款」，如同「打劫」無分別。「普通市民每個月要五、六百蚊罰款的話，正式係民不聊生，搵埋唔夠俾政府罰。」他稱，大多駕駛者都願意合作和守法泊車，只是澳門沒有足夠且靠近民居的合法車位。
李仲森又批評，澳門官員最擅長將原本合法的事情變成不合法，然後處罰市民，卻沒有方法解決澳門交通的問題，形容官員手法非常粗鄙。「道路交通法，越改越差，只是一味加重罰則，咁改善咗啲乜嘢呢？616(遊行)係咩事件？係政府迫到市民像滾瀉的熱水，我哋先出嚟反對。澳門人是順民，好希望澳門和平，過得好好哋，點解要搞咁多反響出嚟呢？」
民建聯理事長李良汪認為，政府建議調升違泊罰款欠缺科學理據基礎的支持，「點解係調升一倍？人哋香港都只係25%。」他認為，當局今次的建議並非拋磚引玉，而是拋磚引「怒」。他說，市民並非要將違泊合法化，而是要政府完善優化居民的出行系統。
交通諮詢委員會委員劉偉強認為，調升違泊罰款對駕駛者，尤其職業司機不公平，他不認同加大罰則便可起到阻嚇作用。認為政府推行政策要和諧友善，應設法創設更多泊車位，而非令市民被迫違法。
社會綜合研究學會會長葛萬金認同建議對醉駕、毒駕和超速駕駛等提高刑事處罰力度，但指出調升違泊罰款要視乎民情和本澳實際道路狀況。
