這是一個星期日早上。Lina早早就去到「俾度莉關注印尼移工組織」會址，準備跟同鄉們一起學普通話。「因為想學，覺得會有用。」有想過甚麼時候回家？「我自己都唔知。因為我細妹啱啱先開始大學，所以我都要幫佢少少。」如果家鄉經濟好，你還會出國工作嗎？「唔會。如果我得，我唔想再喺出便，我一定要返印尼。」Lina斬釘截鐵道。「因為太耐喇。我走咗五年喇，之後都唔想再喺出便做嘢。返屋企返印尼，自己開細舖頭，同爸爸媽媽一齊。我覺得好啲。」
輸出國民 培訓欠奉
根據勞工局的數字，現時來自印尼並從事家傭工作的移工，有3千多人。「俾度莉關注印尼移工組織」（下稱「俾度莉」）負責人楊全德表示，在印尼很難找工作，在國外會較容易，有的印傭知識水平較好，但有部分的證件、證書是偽造的。「因為用正式證件，小學都冇，未畢業，好難出國。」
他指，一些中介公司會到農村「招攬」沒工作的女性。「總之冇嘢做，就帶佢去Surabaya（印尼第二大城市）。好多根本就唔知，Surabaya喺邊都唔知。入咗中介之後唔出得嚟，入去就好似監獄咁，三百個人，一齊住，排隊食飯。一兩個星期可以出嚟，出嚟就去外國了。」
楊全德表示，並非所有中介都會為移工提供良好培訓。「好多一個星期喺度（中介），但最緊要搵到嘢做，搵到僱主，去去去，一個星期就去，咩都未學，就畀錢（中介費）。」他表示，有部分印傭出國前已知道外面的要求，但亦有部分對外面的世界根本毫無認知，電腦也未見過。「因為以前在農村，學校都冇，設備都冇，見都未見過電腦。」「澳門喺邊都唔知。諗住喺中國，『我要去長城！』。但呢啲唔係佢嘅錯，你問老師，老師都唔知。」
僱傭磨擦 根源在哪？
問及一些家傭與僱主間的磨擦，他表示，有僱主很關心家傭，把她們當成家人，但也有印傭曾被虐待，或因要替僱主照顧貓狗等原因，每周休息時間也不足24小時。「有時星期六下午三點，到晚上九點，就叫放假。」「好多老思想嘅人會覺得喺度係做嘢，工具咁，唔太想（你）休息，休息好似冇用了，『我已經請咗你，畀咗錢，你點解坐喺嗰度？』，但唔係好多。」
他表示，即使與僱主相處不來，一些家傭都會選擇啞忍。「頂唔順，換，又要畀錢中介公司，就捱住。」「不然炒魷魚，又唔知喺邊度搵嘢做。細佬仲要讀書，一停工冇得寄（錢），佢哋讀書點？好多這種，已經冇辦法。」最近有越南家傭疑被僱主強姦，楊全德表示，印尼傭工都有類似事件，「但唔敢講，因為覺得已經侮辱咗，自己唔敢講。」
網上不時出現僱主對家傭的投訴，例如對家中小孩老人不好。楊全德認為，這與澳門的托兒配套不足有關。「好多先進國家唔係咁。個社會本身，你有BB，BB放在托兒所，到幾點鐘接回來，托兒所有人專責、專業的，那個更可靠。你請一個工人，個工人識幾多？牌氣又怎樣？（佢）對自己個仔一味都係咁。」亦有人指家傭「手腳唔乾淨」。「社會有很多種人，一個人做壞事，全澳門都會知。唔係冇，有，一個percent都冇，但肯定係全澳門都知。」
不斷進修 舖回國後路
楊全德坦言，在他看來，印尼不斷輸出國民當移工並非國家的出路，認為印尼人需要更多知識才可面對複雜的環境，故每週會舉辦興趣班，如普通話課，讓本地印傭可增值自己。「你需要一定的知識，知識是印尼很需要的。」「學少少都有用，完全唔識唔得。現在有些在印尼也有成績，變了經理助理。因為識中文，識少少都唔同。」
「以前差別很多，以前根本印尼沒希望。仔女讀書又唔夠錢，又不知可在哪找工作，但印尼現在不同，現在印尼有希望，所以我推佢哋：一定要學啲嘢，喺印尼先有用。要安排將來，回印尼後會怎樣。現在賺到錢，三年五年，錢用光了，好多都這樣。買屋買地，整個小舖頭，如果你成功，就留在那。但如果不成功呢？又冇錢，又出嚟？是這個問題，所以一定要學一門知識。」
