新年伊始，特區政府隨即向市民「送大禮」，大幅調升咪表位違泊車輛解鎖費拖車費，引爆民怨，有團體準備星期日發起遊行抗議。摩托車從業員協會今日到政府總部遞信，希望政府能撤回交通事務局調升多項收費，或之後再重整收費表。
摩托車從業員協會主席李仲森認為，政府在公布調整交通事務局收費前，並無諮詢社會意見，一時之間令社會難以接受。他舉例，電單車在合法位無入咪表被鎖就要罰750元開鎖，「咁咪係迫到啲市民唔去有咪表位的地方停車呢？係咪要泊行人路罰200蚊呢？」他認為這是本末倒置，做法讓人難以理解。「鎖一鎖就750蚊，呢個泊車公司就發達啦，以前個個話蝕本，依家唔賺就真係天唔開眼啦。」
李仲森表示，控車政策有很多，例如收緊驗車年期，調升銷售稅等等，而非從市民日常生活無法逃避的方式加價。「例如買車我可以衡量自己經濟能力能否承受得到，但泊車承受唔到嘛，澳門13萬架電單車，你有幾多個車位啊？依家係我被迫去違法，並非我唔想合法。你要我放棄架車輛，咁你公交又搞得唔好，巴士又上唔到，的士又搭唔到，未來仲有千幾項掘路工程，電單車或成為市民主要交通工具，咁樣的罰則，市民點樣去接受呢？」
