停工多年的東望洋斜巷的超高樓項目，獲政府批准可維持已建成81米，發展商已按此高度編製樓宇建築計劃，工務局現正在審批，但該決定違反限高批示。城規會委員陳德勝批評政府帶頭違法，破壞澳門法治精神，「不是行政主導，而是行政霸道！」他擔心此例一開，松山周邊的建築都會以此作為標準，「點解你得，佢得，我唔得？」到時政府將會有越來越多官司纏身，「根據呢個例去到法院，政府係講唔通既。」據他了解，已有團體正計劃再次去信聯合國教科文組織投訴。他說︰「我希望呢封信唔好出，但真係唔好迫我哋(市民)。出咗呢封信絕對是對澳門不利，但無辦法，如果政府要帶頭違法破壞世遺，就只有迫市民走這一步。」
日前政府回應議員質詢時稱，有關項目已經建到81米這麽高了，執埋手尾就算，不要追究。陳德勝指出，2004年，德國科隆大教堂差點被剔出世遺，只因當地政府批准在教堂外一公里的萊茵河對岸興建多棟140米的超高樓。但經教科文組織警告後，一個月內全部拆掉，「人哋有無用一個理由話起咗就算呢？」
陳德勝批評︰「如果政府用咁既態度，益隆炮竹廠都算啦，搞黎有乜意義？御海南灣都不應該收人地，唔賄賂都賄賂咗，咁就算啦。歐文龍做咗咁多事，其實都唔應該坐監，亦都算啦。之後漁人碼頭起90米，算啦，擋下風景有咩問題啊？生活狹窄啲，遷就下經濟發展算啦。如果真係咁，家暴法洗咩立呢？打兩下，算啦，一家人係咁架啦，點解要拉人呢？」
陳德勝表示，保護世遺不是為了個人利益，而是為了社會未來的發展。但政府從都只當世遺是搵錢工具，「佢無一個文化的深度，要保留歷史，讓下一代知道前人係點樣走過來。政府只想到世遺是供遊客參觀，而忽略了澳門人的情感，亦忽略了一班重視世遺的專家學者和朋友。」
他說，澳門現時有好多人扭曲抹黑保育世遺是阻礙城市發展。「呢個係佢地充滿著私心，保育世遺是令澳門城市發展雙贏。點解會俾佢地扭曲，就係因為政府一拖再拖不肯推出總體城市規劃。呢個批示到依家一路都無改，點解唔將佢變成法律？因為政府自己都唔尊重世遺。」陳德勝近期去了泰國和越南考察，發現當地政府對保育世遺視為重中之重的政策。一次他不小心踏在世遺的石板上，即時受到嚴肅批評。「但睇下澳門牌坊，啲人拖隻狗去疴尿，腐蝕到啲石板都穿晒，垃圾搞到週圍都係。」
相關報道︰
東望洋斜巷爛尾樓 工務局准保留81米高度
違限高批示？文化局：尊重客觀事實
