【澳門式標準】為證明山頂新傳染病大樓貼近民居無問題，衛生局請來三名內地衛計委專家來澳出席介紹會。中國疾控中心實驗室管理處副處長趙赤鴻在會上稱，傳染病大樓距離與安全無直接關係，反而應關注有沒有其他措施控制病毒傳播，如通過管理、監控、人員培訓、應變措施等。若這些措施做得好，距離民居多少「沒有太大意義」。他又說，世界各地標準都是按不同國家的情況來訂定，不用太在意。
在論壇的討論環節，立法議員區錦新發言時表示，2003年政府提出興建傳染病大樓時只有一間公立醫院，但現時離島醫院經已興建，且與傳染病大樓一樣在2019年落成，「如果專家有得揀，你會揀近民居定遠民居嘅地方起？」他又指，公共工程經常超時、超支及質量差，「我完全相信現有科技可以確保附近居民嘅健康，但係質量差呢？就難保。我知道在座專家都係醫護人員，唔係建築技術人員，係咪能夠控制好建築質量？」
「多謝區議員嘅意見！但係你嘅概念錯咗，我要糾正你嘅講法。」社文司長譚俊榮回應指，世界各地都把傳染病院興建在綜合醫院旁，山頂醫院內的隔離病房設備殘舊，有必要擴建以完善設備，選址是正確的。他重申，傳染病大樓及離島醫院的設計不同，離島醫院亦會設有隔離病區，「山頂醫院本身就係度，好適合係呢度起傳染病大樓，離島醫院有佢嘅功能，兩者互相配合，希望你明白。」
談及工程質量問題，譚俊榮指，不能將以往公共工程「超時超支質量差」的問題傳染病大樓工程相比，「我哋要往前看嘛，我哋都未起，點解你覺得有問題呢？咁樣對我哋嘅同事士氣有好大打擊，唔可以因為以前有工程延誤就唔去做，就唔起傳染病大樓。唔啱㗎，唔對㗎！咁嘅話任何嘅建設都唔可以發展。」
立法會議員列席論壇
醫護界間選議員陳亦立亦加入戰團，指區錦新提出的概念貌似正確，「你唔清楚核心問題就話而家山頂未有設施、無能力完全保障二千幾個醫護人員嘅安全。你硬係唔准佢起，我愈聽愈驚！」又謂現在山頂醫院有如「小米加步槍」般應對傳染病，「咁多人係山頂做嘢，你完全好似無感覺咁？」他又激動地說：「作為一個醫護人員，我真的不理解為什麼興建傳染病大樓來保護醫護人員，大家會反對呢？設施設備不足，保護不足，政府才會加強傳染病防治的設施。如果在設施設備不足的情況下，居民還不准興建的話，我覺得說不過去。」
區錦新則回應指：「而家無人反對興建傳染病大樓，而係選址上有爭論，並唔存在社會唔想保護醫護人員嘅概念。我無唔俾佢起，我唔會係度同陳議員拗，留返係立法會先拗。」又指醫護人員是市民健康安全的第一道防線，絕對要保護他們，促請政府在傳染病大樓興建前，確保醫護人員的健康。
