交通問題一向是市民炮轟的重災區，交通局局長汪雲下月終於放下重擔。運輸工務司司長羅立文在總結一連兩日施政辯論時，特意提到汪雲的離職，涉及公務員士氣低落的問題。對於如何提升屬下士氣，他希望社會及立法會理解公務員的工作壓力。
羅立文表示，自己去年底回澳前並不認識汪雲，但「一回到澳門，見十個人，有八個都係講呢位同事。」但經四個月共事後，他十分欣賞汪雲的工作表現，並「完全明白，完全接受」汪雲以私人理由辭職，「如果我係佢，或者……都唔係或者，係好大可能做同一個決定。」
下屬卸責成風 羅司︰我真係唔知點解決
另外，羅立文承認屬下部門存在「卸責」文化，「但係點樣解決？我都唔知！或者要啲時間，逐步改善。」
他表示，有一次出席諮詢委員會時，「有委員嘈得好犀利，要求解釋法律」，但相關範疇的法律代表「無嘢講」，他已要求屬下官員日後開會，「一定要開把口，一定要有嘢講！無可能代表去開會，有事出唔到聲，解釋唔到！」
他亦指出，卸責文化同樣出現在收則工作上，「呢個人無能力簽(則)，無能力發現問題，呢個人就唔應該去收則。有問題，寫！無問題，簽！一個人揸唔到主意，就兩個三個！」
他又透露，下屬部門人員晉升文件交他確認時，附上大量履歷，「我都唔識呢個人，交俾我做咩？！」他表示，政府行政程序多，文件又多，自己有很多重擔在身，「孭到我腰骨痛」。他認為政府人員不願「孭鑊」是「一個問題，一個文化，點解決？我真係唔知！」
