第六屆立法會選舉競選宣傳期於上週六正式展開，24個候選組別在為期2週的宣傳期內各出奇謀，以各種各樣的方式宣傳自己的政績、參選理念及政綱。其實早在禁止宣傳期前，已有不少組別以不同的方式對政團參選進行宣傳，如街站、派傳單、利用社交媒體宣傳等。面對這些疑似「偷步宣傳」，選管會主席唐曉峰卻稱，在禁止宣傳期之前候選組別的宣傳行為，選管會「管不了」。選管會的回應，其實就正正反映選舉法在規範宣傳行為上存在灰色地帶。
另外，「天鴿」風災過後，有意見亦認為當局應該將立法會選舉的投票日延後2周，讓社會有足夠時間作準備，此舉意味者選舉宣傳期亦可能隨之而延長。但近日選管會則對此建議「打槍」，稱市面已回復穩定，票站設施亦無受太大影響，又指選舉過後仍有大量工作要進行，加上緊接數日為公眾假期，進行選舉日程的時間也將非常緊迫，「企硬」立法會選舉投票日如期進行。
事實上，過往坊間亦有不少意見認為當局應延長宣傳期，讓各個候選組別有更多時間進行宣傳，帶動社會參與立法會選舉的氣氛。時事評論員蘇文欣表示，為期2週的宣傳期十分短，但一般的選舉工程其實並不限於宣傳期以內。指現屆議員往往會與所屬的社團有連結，過往均以所屬社團身份宣傳議會工作，「無論係街坊會、同鄉會、後援會好，其實過往一段時間佢哋一直都宣傳緊，你話我係議員，我有權講我係議會嘅工作，其實佢哋一直係度做緊工夫。」
反觀新興、弱勢政團缺乏上述優勢，「變咗你得2個禮拜時間去玩，即使你幾咁好，都好難話到畀人聽。因為係呢2個禮拜時間之中，社會充斥住好多資訊，你有無機會可以突出到你嘅特色？唔係唔得，但唔係容易事。」他認為，在這種情況下，顯然不利於新興、弱勢政團，「議員本身就係議會入邊嘅人，佢又宣傳緊佢嘅團體。即使唔係宣傳期時，都仍然做緊工夫。算唔算偷步？佢又無喎。」
但蘇文欣亦指出，延長宣傳期亦可能對弱勢政團存在不公平的情況，認為延長與否應考慮到政團的資源運用問題，「唔同政團有唔同嘅資源，如果大家遵守規則的話，2週嘅宣傳期對於資源不足嘅政團來講，就唔需要拖得太辛苦。反之若果宣傳期延長到1個月或以上，資源龐大嘅政團當然無問題，弱勢政團無論係人力、物力上都可能應付唔嚟。」
對於選管會稱「管不了」禁止宣傳期前候選組別所作出的宣傳行為，蘇文欣坦言，選管會在「偷步宣傳」方面考慮得亦不夠周詳，「如果係咁，你立呢條法又有乜意思？又話登記參選之後就唔可以宣傳，否則就要罰，但之後又出嚟又話管唔到禁止宣傳期之前嘅嘢，好『公平』咁放過哂所有人，包括資源唔多嘅政團。」他亦認為今屆選舉的情況比過往更加混亂，選管會對於法律的演繹及解釋較上屆更「離譜」，「甚至我有感覺，選管會有啲離地，佢哋感受唔到澳門人係點樣選舉。」
時事評論員蘇文欣