社交平台Facebook有不少討論群組，話題圍繞北上消費，或是討論時事，比比皆是。本媒瀏覽部分涉及北上消費的言論，當中有支持亦有反對，甚或反諷北上消費習慣。大部分以「廣東話口語」寫成，藉此或可一見部分澳門人對北上消費的態度。
網民：畀個理由我留澳消費？
部分Facebook群組如「珠海美食團」等不乏「北上攻略」，從拱北、夏灣到北山，不少網民分享在珠海哪些區分有「抵食」、「抵玩」、「高質量」的飲食店鋪，包括燒烤、咖啡店、飲茶、日式料理、任食牛肉火鍋、海鮮市場及加工食店等，除珠海外，亦不乏介紹廣東省其他城市好去處。平均而言，人均消費不出一百、兩百人民幣，便有「CP值高」的安樂一餐。
綜觀網民對熱門帖文的回應，多是留言詢問介紹食店的地址、價錢、評價如何。亦有網民介紹到哪一間珠海街坊食店的心水菜單，教路避免在晚飯黃金時間幾點前往才有位置、「食燒烤一定北上啦」等等。
普遍而言，對北上飲食消費態度正面，認為無論價錢、服務均比澳門高。
有網上意見指，本澳疫情過後業主即加租，令市場經營更難，不少店鋪「捱唔住」。
對於選擇「北上消費」，有留言指，「打工仔三年無加人工，上大陸消費唔幫襯佢，啲商家佬就嗌曬救命。大佬呀，揸住舊錢消費，無錢就要馬死落地行，搵平啲嘅地方呀，用品質安全去換，都要搵命搏㗎。講真，上去都有時間成本，一街都係簡體字，見到都頭暈，真係咁過癮咩。打工仔家中有老有少，仲邊有餘力去『撐小店，撐本土』呀。」
又有帖文介紹北上吃火鍋，「兩個人叫咗七樣嘢，食到飽，澳門可能要600+，畀個理由我留澳消費，北上消費真係好多選擇，價錢公道，見到澳門處處吉鋪都係咎由自取！」「珠海美食多，又價廉，澳門飲食業黃金檔期已過，將會面對漫長的寒冬。時移勢易，人不定勝天！哈哈」
有部分支持「北上消費」的言論，提到本澳不少業主加租讓市場更困難。
「疫情過後業主即刻加租，好多店鋪都捱唔住。不過，租金加幅轉嫁落幾年無人工加嘅打工仔身上，人地北上又真係無得怪㗎喎！」「呢三年澳門打工仔嘅購買力減少咗幾多，真係有口難言呀。」「租金貴唔係收得貴又難食、服務唔好嘅擋箭牌，老實講，有好多店鋪基本上無『澳車北上』都會被自動淘汰，雖則澳門人都無咩味覺、屎都話好食，但有啲真係離譜到寧願北上食化學元素好過。」
提及北上到「山姆超市」消費便宜又抵買，另有留言指，「買包bagel廿幾蚊有八個，澳門食一個要三十幾，又得佢先有賣，吹漲。」
網民意見指，需要「畀個理由」說服自己在澳消費。
網民：北上飲食「化學元素表」
然而，其他時事群組如「澳門高登起底組」等，便有零星言論，對「北上消費」的意見多了些揶揄意味。例如，其中有帖文指出，「北上」價錢抵、品質高，留言點出另類觀點指，「多得呢啲假日北上消費群，五六日係澳門食嘢比較清靜返」、「淨係出去一轉時間成本都彌補唔返啦，by the way 支持北上消費，最好唔好返嚟」、「其實咁鐘意點解唔搬上大陸，成日要舟車勞頓過關咁辛苦。」
亦有言論同意澳門鋪租貴是決定成本、價錢高企的最大因素，但批評消費者不顧結構因素直接比較兩地物價。「即係咁，你認為去食化學元素表係叫多選擇嘅，無人會阻你，不過如果攞大陸物價嚟插澳門做中小企嘅係賺到盡的話，麻煩你自己行出街，求其搵間唔見得人、細到無朋友嘅內街吉鋪，打個電話問吓地產幾錢租先。」
亦有言論指，無論物價、鋪租、人工成本，澳門均是內地數倍計，沒有可比性。
另有帖文附上山姆超市外排隊照，「澳門人嘅超級市場，大部分都係澳門人。」對於內地超市人頭湧湧，其中不少香港、澳門顧客。
有網民亦指，「咁多人，行都行得唔舒服，仲要洗錢，去黎都無謂，平幾多都彌補唔到咁差嘅消費體驗。」「在外國行Costco好舒服好治癒，去大陸行好似去行花市咁樣。」
