立法會選管會早前宣佈取消21名直選參選人的資格，引起社會極大爭議。今日《澳門講場》大部分致電的市民均表示對選管會的做法感到不滿。多名市民認為即使上訴到終審法院，亦不能「翻盤」，「個班人有心DQ佢哋的話，終審法院會畀機會佢哋翻生咩？」亦有市民表示，社會完全沒有不同意見絕對不是好事，「澳門咁乖乖到咁樣的程度，都仲要咁樣做？大家係好不安。」
市民張先生表示，中央都希望社會有不同聲音，只要不激進，不會癱瘓立法會可以。澳門非建制陣營的力量其實很微薄，不可能會出現奪權或癱瘓立法會的情況，「呢啲唔係敵我矛盾，係人民內部矛盾，係可以化解，有得傾嘅。」他懷疑今次事件未必是中央指令。張先生又表示，對現時被DQ的現任議員都有不滿，但整個社會完全沒有不同意見絕對不是好事。「呢啲反對聲音是可以接受，但搞到依家咁，成個社會好不安，澳門咁乖乖到咁樣的程度，都仲要咁樣做？大家係好不安。」
市民周先生則批評「擁護」和「效忠」的定義模糊，主觀性強，不能以此作為取消參選資格的理據。「聲稱好效忠，好擁護，點知入到立法會四年，原來都係白出糧，無為市民發聲，無為市民做實事的話，口口聲聲話『擁護』，話『效忠』，作為一個普通市民黎講，對唔住，我哋唔係需要一個咁樣的議員。」他指出，現時被DQ的兩名參選人都是現任立法會議員，「他們為市民效命，立法會都無DQ佢，選管會又有何資格呢？」
周先生又表示，被DQ的兩名現任議員，過去四年的表現都非常好，「我夠膽講，立法會無一個直選議員比佢哋更為勤力。呢個相信唔係淨係我一個人講，亦都好多市民認同。好多聲稱『愛國愛澳』的議員，做咗十幾年，其實佢哋又做過啲乜嘢出黎呢？對今次事件好痛心，我係呢到活咗三十年，我無諗過澳門呢個地方係咁樣，如果係咁樣，不如直接委任，唔使選舉啦。」
市民王先生則不相信司法獨立，「終審法院真係獨立審案咩？你信唔信啊？君要臣死，臣不能到午夜。依家呢個咩年代呢？皇帝呢年代啊嘛，你真係法治年代，民主年代咩！澳門不嬲都係無民主架啦。」他表示，澳門民主派只是「花樽」，根本起不到作用，完全無必要趕盡殺絕，「連幾個無作用的花樽，佢(政府)都驚到震，要殺咗佢，仲有咩可以做得到？法院？嘥氣啦！法院又咪聽黨話，跟黨走！」「澳門人幾鬼乖，乖有鬼用咩？」
市民陳先生表示，選管會今次的舉措相當嚴重，等同剝奪市民的政治權利，而且標準一時一樣，影響市民對當局執法的信心。市民黃先生則表示，早前與朋友談到「今日香港，明日澳門」，「估唔到咁快殺到過嚟。」他又認為，即使被DQ的參選人上訴到終審法院亦不可能「翻盤」，「個班人有心DQ佢哋的話，終審法院會畀機會佢哋翻生咩？」
