6月1日的持續暴雨除了造成澳門半島不少地方水浸外，氹仔有地方出現水浸。
6月1日由凌晨起持續暴雨，引致多地區出現水浸，有議員及社諮委員盤點水浸點有下環、司打口、內港、新橋區、台山、青洲、望廈等，甚至連氹仔亦有地方出現水浸，質疑當局多年解決的水浸的成效。同時，位於爹美刁施拿地大馬路、耗資逾1.1億元、正在試運中的內港北雨水泵站的排水能力亦備受懷疑。市政署管理委員會委員麥儉明昨（8）回應傳媒問及今次水浸時表示，正研究優化內港北雨水泵站系統設置，讓泵房的功能達至最佳。
市政署管理委員會委員麥儉明昨（8）接受傳媒訪問。
麥儉明又表示，現時澳門水浸黑點比20年少。至於目前水浸黑點具體數字，麥表示「畀唔到準確數字」、「個數無意思，你（記者）同我攞個數（字）」。問及水浸黑點有否增加，麥則指，「在整理當中，無話多或少⋯⋯趨勢同20年前比係少咗。」
他又指，市政署會「短期」內向上級提交報告，除了列明水浸黑點，報告亦包括水浸原因、改善方案，「有短期、中期、長期（措施），因為都唔會係一年半載解決全澳嘅水浸問題。」
本媒就記者針對6月1日的水浸提出的問題，以及麥儉明的回應作了以下節錄：
記者：6月1日當日其實內港北雨水泵站排水量有冇達到原先目標？以及相關檢討工作如何？
麥：泵房剛建成，6月1日做咗一個好大測試。我哋已經係事先（6月1日前）亦都做咗一啲測試，但係未曾遇到咁大雨水量。大家都知道已經破咗70年來嘅紀錄，雨水的總量亦都係瞬間一個小時內接近120毫米，亦都有史以來第二大，所以我哋可以咁講，係未遇到咁嘅情況。我哋事後亦檢討，泵房嘅效力去到邊度呢？我哋睇到佢就係起到一定作用，睇到周邊水浸嘅情況同埋去水的速度，確認泵水係起到一定作用。事後亦都去到拜訪商戶、街坊，佢哋普遍都認為泵房對排洪起到一定作用。
泵房係有一個提升空間，即係排澇的能力有提升的空間。我哋而家就係調試緊泵房啟動時間，希望佢可以早啲啟動，咁就將水位盡量降低，因為泵房有3台泵可以同時運作，技術員正在調試。我估計將來泵水嘅排洪能力有一個提升空間。
記者：若以泵房最理想的狀態，以6月1日的雨量，泵房的能力如何？
麥：我哋睇一個泵房嘅能力同水浸嘅關係，係唔能夠對應。因為降雨量有陣時可能是一個數值，但密度集中在某一段時間（數值）又唔一樣。設計該泵房時考慮其位置所對應的集雨區域，泵房主要集雨區域只主要康公廟、十月初五街、庇山耶街、新馬路一帶。設計泵房的集雨面積沒有計到沙梨頭、司打口嗰邊。但係，6月1日的情況係泵房不單泵所屬區域嘅雨水，亦要處理沙梨頭以及司打口流入雨水。當然，盡量可以調升雨水泵房排洪嘅能力，不但有助本身集雨區域排洪，亦可以幫助其他周邊地方嘅雨水排洪。
記者：泵房最理想的狀況是否可以處理康公廟、十月初五街、庇山耶街嘅排洪需要？若以6月1的雨量，可否？
麥：其實我而家答你（記者），可能有啲誤導，因為因素實在太多。如果簡單講，單講返泵房所對應嘅區域，我哋認為雨水泵房係足夠應其所對的集雨區的雨水。據數據同泵嘅設計能力⋯⋯由於有泵房，根據統計數字，雨水消退嘅速度比以前快好多。
內港北泵房 （資料相片）
記者：快幾多？可否公佈數字呀？
麥：我手上無相關數字，我手上未有相關數字。
記者：能力有幾多上升空間？
麥：調整泵的運作是一個過程，要技術人員慢慢分析，如何好好利用嗰泵。
記者：而家泵房未去到最佳狀態？距離最佳仍有幾多成？
麥：未去到最佳狀態，（距離最佳仍有幾多成？）我今日答唔到你（記者），我今日答唔到你。
記者：可否講下泵房當日嘅狀態如何？當時的處理嘅能力如何？試運行嘅能力如何？有冇數據？
麥：數據比較複雜，簡單講泵房有四台泵，有3台係預佢運作，1台後備。當時，用了2台泵，第3台泵未用。當時嘅setting未到第3台泵用嘅時候。我哋可以調整一下泵的運作，係唔係有條件3台都開？因為技術問題，好難解釋比你哋（記者）聽，最佳狀態當然係3台泵一齊開，係最好嘅排洪狀態。
記者：當日點解得2台開？2台泵及3台泵處理排水嘅能力差幾多？
麥：都話係setting，是成個系統，唔係話郁就郁。嗰setting而家要調整。從理論上，每台泵嘅能力都係咁大，一台泵大概4立方米/秒，3台泵大概12立方米/秒；大約理想嘅數據，最佳（狀態）係約13立方米/秒。
記者：市政署整理水浸黑點、水浸報告比特首及司長，進展如何？預計幾時交？
麥：而家做緊。我諗短期就會交到。
記者：主要整理水浸黑點，還有其他？
麥：諗經過6月1號嘅事件後，要查原因，報告要有原因、改善嘅方案。有啲短期、中期、長期（措施），因為都唔會係一年半載解決全澳嘅水浸問題。
記者：市民唯有希望唔好咁大雨，否則繼續水浸？
麥：當然唔希望（大雨），低窪地區居民都居安思危。（記者：落雨市民就要預水浸？）（水浸）唔係今年或呢兩年發生嘅事，土生土長嘅人都知道，若澳門有很大嘅雨其實很多低窪地區都長期有水浸嘅現象。
記者：市政署以前一直冇水浸黑點？而家先整？
麥：有，已經有水浸黑點。
記者：而家會多或少咗？
麥：在整理當中，無話多或少。趨勢同20年前比係少咗。
記者：而家有多少水浸黑點？
麥：我比唔到準確數字。
記者：有咁多？多到記唔到？
麥：個數無意思㗎，你（記者）同我攞嗰數（字）。我知道水浸黑點如內港北、內港南、光復街、永樂。
記者：如何定義水浸黑點？
麥：用雨水測量計看到數字，咪知道。
