議員梁孫旭關注本澳樓價高企，但政府的經屋供應如「擠牙膏」，九成多本地居民難以申請經屋，促請政府一次性開放更多經屋申請，令居民上樓有望。特首賀一誠回應時表示，「起樓唔係砌積木，咁快可以砌到出來，啲屋都唔係紙紮的」，經屋的興建要依照相關行政程序，必須要有設計、戶型和棟數先可以開隊。他承諾，任期內的經屋規劃一定會實現。
賀一誠表示，如果是私人投資者建造樓宇，只要政府核准圖紙後就可以隨時開工，但政府興建經屋有規定的行政程序，若簡化程序或會被批不公開透明，會存在更大問題。因此，未來經屋工程招標時或會採用設計連興建同標的方式，以加快行政程序。
賀一誠又稱，如果要加快經屋興建進程，或需更多建築業工人，但現時本地勞動力不足，若再請外僱又會引起社會爭議。「係咪又要加外僱？係咪有其他人可以參與工作呢？」
對於經屋未來的規劃，賀一誠表示只能承諾其任期內的規劃，「唔可以排到十年之後，唔係我任期內嘅嘢都幫你排出來，呢個係唔現實」。又稱，新城A區規劃有2.8萬公共房屋，其中2.4萬已經規劃為經屋及社屋，餘下的4千單位未來或會根據居民所需，用以增加適合戶型的數量。
