![不少市民向Bobo獻花,並在Bobo生前居住的區域前系上白色絲帶,並在紀念布上簽名或寫上感言,以表悼念之意。](https://aamacau.com/files/uploads/2018/12/aamacau-photo-181218_1218_0400-1080x720.jpg)
不少市民向Bobo獻花,並在Bobo生前居住的區域前系上白色絲帶,並在紀念布上簽名或寫上感言,以表悼念之意。
澳門保護遺棄動物協會聯同七個動保團體於十二月一日,在二龍喉公園舉行悼念黑熊Bobo的集會,反對民署將Bobo製作成為標本,有超過一百名市民參與。不少市民向Bobo獻花,並在Bobo生前居住的區域前系上白色絲帶,並在紀念布上簽名或寫上感言,以表悼念之意,而發起集會的動保團體亦在現場收集簽名。多名市民及動保團體代表發言時感激對民署多年來對Bobo的照顧,但就批評民署執意將Bobo的遺體製成標本之舉是一意孤行、漠視民意,又質疑民署今次極速製作標本是早有預謀,促請民署將Bobo入土為安,回歸大自然。
有動保團體代表坦言:「如果對生命唔尊重,即使有幾好嘅食、幾好嘅住畀佢都係假嘅。」
![保護遺棄動物協會主席蔡詠子。](https://aamacau.com/files/uploads/2018/12/aamacau-photo-181218_1218_0400-2-1080x720.jpg)
保護遺棄動物協會主席蔡詠子。
![有動保團體代表坦言:「如果對生命唔尊重,即使有幾好嘅食、幾好嘅住畀佢都係假嘅。」](https://aamacau.com/files/uploads/2018/12/aamacau-photo-181218_1218_0400-3-1080x720.jpg)
有動保團體代表坦言:「如果對生命唔尊重,即使有幾好嘅食、幾好嘅住畀佢都係假嘅。」
有動保團體代表質疑亞洲黑熊是否屬於有科研價值的動物?「唔通大家無乜機會見到呢種動物嘅形狀、生活習慣?唔係㗎嘛。而家正正係一個官員嘅決定,就將所有愛護Bobo嘅人嘅決定蓋過,一意孤行。」他又指,民署其中一個觀點就是將Bobo的標本作為保護動物的宣傳及科普教育,「我膽敢問一聲,各位官員明唔明乜嘢係動物保護?動物保護最精粹嘅地方係對生命嘅尊重,如果對生命唔尊重,即使有幾好嘅食、幾好嘅住畀佢都係假嘅。」
亦有動保團體代表表示,今次事件正正讓其他地方看到澳門政府對動物有多「友善」,尤其對一些已經離世的動物,「一啲尊重都無,我希望政府檢討吓,希望有朝一日澳門可以成為一個人同動物都真正友善嘅城市。」亦有動保團體代表指,政府雖表明將Bobo製成標本具有科普教育的作用,但Bobo不是瀕臨絕種的動物,亦對澳門人來說有很深厚的感情,「政府做嘅嘢有無諮詢過我哋?有無顧及我哋澳門人嘅感情?」
保護遺棄動物協會主席蔡詠子表示,Bobo三十多年來在一個孤單淒清的地方生活,而離世後被製成標本,亦是孤單地被放置在標本館當中,「呢個係咪真係一個保護動物嘅訊息?絕對唔係,點解佢死咗之後唔可以入土為安,回歸大自然,自由自在?」她又質疑今次民署早有預謀,「我哋點快都快唔過佢哋,有幾多把口都大唔過佢哋。主席(戴祖義),你嘅豐功偉績,你思維嘅奇特,係澳門都好罕有,可唔可以係你死後將你製成本讓市民懷念?」
![澳門保護遺棄動物協會聯同七個動保團體在二龍喉公園舉行悼念黑熊Bobo的集會,反對民署將Bobo製作成為標本,有超過一百名市民參與。](https://aamacau.com/files/uploads/2018/12/aamacau-photo-181218_1218_0400-4-1080x720.jpg)
澳門保護遺棄動物協會聯同七個動保團體在二龍喉公園舉行悼念黑熊Bobo的集會,反對民署將Bobo製作成為標本,有超過一百名市民參與。
而協會副主席劉佩珍就表示,今次集會主要希望讓政府知道,有許多人反對將Bobo製成標本,「只不過我哋唔夠你(官員)個口大,但我哋都要企出來話畀你聽,我哋係唔贊成呢樣嘢。如果今日唔企出來,好可能第時會有第二、三、四個Bobo事件,因為無人反對的話,政府使乜理你市民意見?連諮詢都唔使諮詢就可以做。」又指不論集會人數多與少,集會的意義才是最重要。
民署管委會主席戴祖義日前受訪時就直斥有部分網民不理性,「你哋講到有血有淚,有幾耐無探過Bobo呢?」對此,有市民就反駁:「我覺得(戴祖義言論)真係難聽過粗口,要去探Bobo,係唔會敲鑼打鼓咁話畀人去聽,起碼我每日返工都會兜路上嚟睇佢。唔係突然間有好多人關心Bobo,而係你突然話要做標本,大家好反感!」她指,感激民署照顧Bobo多年,但曾經向民署提議在戶外區域加裝遮陽篷,「但我打咗好多次電話,佢哋都推倘我,最後一次佢哋竟然話,驚搭咗篷之後,Bobo會偷走。佢咁答我之後,我覺無需要再打電話,因為無意思。」
環保人士陳俊明哽咽道:「我多謝民署養咗佢咁多年,但係民署當佢係乜嘢?只係咁多動物當中嘅其中一隻?我估飼養員會有同佢傾過偈,但我肯定戴主席無。」
![不少市民向Bobo獻花,並在Bobo生前居住的區域前系上白色絲帶,並在紀念布上簽名或寫上感言,以表悼念之意。](https://aamacau.com/files/uploads/2018/12/aamacau-photo-181218_1218_0400-1-1080x810.jpg)
不少市民向Bobo獻花,並在Bobo生前居住的區域前系上白色絲帶,並在紀念布上簽名或寫上感言,以表悼念之意。
曾經與戴祖義直接對質的直選議員蘇嘉豪則慨嘆,一個政府連小動物的事都不能處理好,「五百多隻格力犬搞唔掂,一隻黑熊都搞唔好,你點旨意呢個政府可以搞得掂人嘅問題?」他又指,會利用市民賦予議員的權力向政府索取資料,要求政府交代聲稱現有的三百多種標本的種類、何時捉到、何處發現及有何價值,亦會要求政府交代標本館的設計及工程費用,「全部嘢都要透明,而非利用Bobo去做一啲唔知洗幾多錢嘅嘢、唔知達到乜嘢成效嘅嘢。」