澳門保護遺棄動物協會聯同7個動保團體在二龍喉公園舉行悼念黑熊BOBO的集會，反對民署將BOBO製作成為標本，有超過100名市民參與。不少市民向BOBO獻花，並在BOBO生前居住及活動的區域前系上白色絲帶以表悼念之意，而發起集會的動保團體亦在現場收集簽名。多名市民及動保團體代表發言時感激對民署多年來對BOBO的照顧，但就批評民署執意將BOBO的遺體製成標本之舉是一意孤行、漠視民意，又質疑民署今次極速製作標本是早有預謀，促請民署將BOBO入土為安，回歸大自然。
有動保團體代表坦言：「如果對生命唔尊重，即使有幾好嘅食、幾好嘅住畀佢都係假嘅。」
有動保團體代表質疑亞洲黑熊是否屬於有科研價值的動物？「唔通大家無乜機會見到呢種動物嘅形狀、生活習慣？唔係㗎嘛。而家正正係一個官員嘅決定，就將所有愛護BOBO嘅人嘅決定蓋過，一意孤行。」他又指，民署其中一個觀點就是將BOBO的標本作為保護動物的宣傳及科普教育，「我膽敢問一聲，各位官員明唔明乜嘢係動物保護？動物保護最精粹嘅地方係對生命嘅尊重，如果對生命唔尊重，即使有幾好嘅食、幾好嘅住畀佢都係假嘅。」
亦有動保團體代表表示，今次事件正正讓其他地方看到澳門政府對動物有多「友善」，尤其對一些已經離世的動物，「一啲尊重都無，我希望政府檢討吓，希望有朝一日澳門可以成為一個人同動物都真正友善嘅城市。」亦有動保團體代表指，政府雖表明將BOBO製成標本具有科普教育的作用，但BOBO不是瀕臨絕種的動物，亦對澳門人來說有很深厚的感情，「政府做嘅嘢有無諮詢過我哋？有無顧及我哋澳門人嘅感情？」
保護遺棄動物協會主席蔡詠子表示，BOBO三十多年來在一個孤單淒清的地方生活，而離世後被製成標本，亦是孤單地被放置在標本館當中，「呢個係咪真係一個保護動物嘅訊息？絕對唔係，點解佢死咗之後唔可以入土為安，回歸大自然，自由自在？」她又質疑今次民署早有預謀，「我哋點快都快唔過佢哋，有幾多把口都大唔過佢哋。主席（戴祖義），你嘅豐功偉績，你思維嘅奇特，係澳門都好罕有，可唔可以係你死後將你製成本讓市民懷念？」
保護遺棄動物協會主席蔡詠子
而協會副主席劉佩珍就表示，今次集會主要希望讓政府知道，有許多人反對將BOBO製成標本，「只不過我哋唔夠你（官員）個口大，但我哋都要企出來話畀你聽，我哋係唔贊成呢樣嘢。如果今日唔企出來，好可能第時會有第二、三、四個BOBO事件，因為無人反對的話，政府使乜理你市民意見？連諮詢都唔使諮詢就可以做。」又指不論集會人數多與少，集會的意義才是最重要。
民署管委會主席戴祖義日前受訪時就直斥有部分網民不理性，「你哋講到有血有淚，有幾耐無探過BOBO呢？」有市民就反駁：「我覺得（戴祖義言論）真係難聽過粗口，要去探BOBO，係唔會敲鑼打鼓咁話畀人去聽，起碼我每日返工都會兜路上嚟睇佢。唔係突然間有好多人關心BOBO，而係你突然話要做標本，大家好反感！」她指，感激民署照顧BOBO多年，但曾經向民署提議在戶外區域加裝遮陽篷，「但我打咗好多次電話，佢哋都推倘我，最後一次佢哋竟然話，驚搭咗篷之後，BOBO會偷走。佢咁答我之後，我覺無需要再打電話，因為無意思。」
環保人士陳俊明哽咽道：「我多謝民署養咗佢咁多年，但係民署當佢係乜嘢？只係咁多動物當中嘅其中一隻？我估飼養員會有同佢傾過偈，但我肯定戴主席無。」
曾經與戴祖義直接對質的直選議員蘇嘉豪則慨嘆，一個政府連小動物的事都不能處理好，「500多隻格力犬搞唔掂，1隻黑熊都搞唔好，你點旨意呢個政府可以搞得掂人嘅問題？」他又指，會利用市民賦予議員的權力向政府索取資料，要求政府交代300多種標本的種類、何時捉到、何處發現及有何價值，亦會要求政府交代標本館的設計及工程費用，「全部嘢都要透明，而非利用BOBO去做一啲唔知洗幾多錢嘅嘢、唔知達到乜嘢成效嘅嘢。」
