「同性戀要診治」論 各有說法 究竟梁慧琪講咗乜?

即時報道

文:論盡採訪組

時間:2018年08月22日 22:22

教青局副局長梁慧琪(資料圖片)

有葡文報章上星期(16日)報道,教青局副局長梁慧琪受訪時表示,同性戀學生將會被轉介診治。教青局其後不只一次澄清,曾指相關報道與受訪時所述的內容不符。

「公說公有理,婆說婆有理」,究竟當日梁副局長講咗乜?根據《論盡》得到的一段約7分鐘的錄音,記者於1:32問到:「係咪即係話同性戀嘅學生唔識得去知道自己嘅性傾向?」

訂閱每月紙本

梁慧琪答:「其實有一啲青少年佢可能同同性朋友比較好,唔等如佢係一個同性戀。其實同性戀呢,按呢個叫做DSM-5呢本書,係一個,ER,喺我哋叫做心理學啦,係一個……一般精神科醫生……醫生去用嘅一個診斷嘅書,咁佢係有一啲嘅描述嘅,而我哋一般嘅輔導員呢,佢並唔係一個呢啲咁樣嘅精神科醫生啦,PSYCHIATRIST,所以我哋唔會去定呢樣嘢囉。但佢心理上嘅需要呀,佢有啲咩,我哋係會提供一個支援同輔導。包括如果佢家長需要,我哋都會。」

會轉介去甚麼部門?梁慧琪於錄音的3:34答:「其實究竟佢係唔係同性戀呢,係需要一個叫CLINICAL DIAGNOSIS,咁所以,ER,會轉介去呢一方面嘅…嘅…ER臨床……」翻譯問:「醫院定係……」梁續答:「或者醫學嘅人員,即係人哋譬如精神科呀咁。」又於4:13補充:「或者係簡單講,即係一啲臨床心理學家囉。因為我哋係唔會做呢個診斷嘅,但佢一般嘅需要,心理上嘅需要我哋係會提供一個支援。」

被問到「教青局是否認為同性戀是病」,梁於4:45答:「我諗我哋唔係去睇呢樣嘢囉,教青局係做一啲教育同預防嘅工作。倘若有學生喺呢方面有需要,我哋係會去輔導佢,我哋唔會喺呢方面做一個……」

ad

梁又於5:25表示:「如果佢係需要一個診斷呢,即係我哋唔係去做診斷嘅,如果佢需要一個診斷,我哋會去轉介呢方面啦,但係即係如果佢係有一啲特別需要做一啲臨床輔導啦,咁我哋會轉介囉。」又於翻譯後續指:「但係呢個唔係我哋重點囉。我哋嘅重點,其實教青局學生輔導呢,我哋係幫助學生佢可以順利就學,所以如果佢嘅呢個性傾向會影響到佢學習,我哋會去幫佢囉。」

有媒體報道,當日的訪問長約43分鐘。據了解,是包括了中文傳媒及葡文傳媒的訪問時間。順帶一提,梁副局長提到的DSM-5,由美國精神醫學學會所著。1973年,美國精神醫學學會(American Psychiatric Association)投票表決,把在《精神疾病診斷與統計手冊》第二版中列為精神疾病的同性戀分類去除。

教青局:一直尊重多元價值

本媒曾向教青局查詢副局長言論中”CLINICAL DIAGNOSIS”、「轉介精神科」的意思。局方回覆表示,一直透過品德與公民科目要求學生尊重不同人士的性傾向,通過正規課程和輔導服務協助學生接納自己的性別及角色,並且強調學生必須學懂尊重不同的價值觀,拒絕任何形式的歧視。

回覆又指,教青局有資料顯示,有部分學生在成長過程中會因性別的情況感到困惑,也可能會因此而感受到來自周遭環境的壓力,甚至產生焦慮。如果學生因個人性取向提出輔導要求,而其心理或精神困擾已影響其學習、生活或身心健康成長,學生輔導員會向其提供協助;倘困擾的情況需要更深層的輔導,並超出學生輔導員可協助的範圍及程度,才會建議向專業人士作出轉介。作為非高等教育的主管部門,主要負責各項教育和輔助青少年成長,所以,如果學生因其性別取向、性別不安/焦慮而影響學習、日常生活、精神健康及身心成長,則會按其要求轉介專業人士作臨床診斷或心理輔導跟進,協助學生健康成長。

教青局又指,按學生輔導工作的指引,相關轉介必須得到學生及其家長的同意,且絕對不會強制,亦必須保密。又表示截至目前為止,局方及其他學生輔導機構從未對任何因對性取向存在困惑的學生,向任何醫療機構作出過轉介,也未有學生要求轉介。

教青局重申,一直尊重多元價值,協助學生成長,從課程、教材、學生輔導、入校活動,以及社區教育等多元方式,提升學生兩性平等、尊重他人的意識與價值觀。自2007年以來開展性教育的教師培訓,一直有涵蓋性別平等、尊重多元,以及性取向的議題,提升教學人員的多元視野;而配合《基本學力要求》編寫的品德與公民及性教育教學輔助教材,強調學生必須學懂尊重不同的價值觀,高中階段,設有單元討論性別議題,讓學生學會以平等、尊重及包容態度對待不同性取向的人士,並附設相關教學參考資源。

錄音之粵語逐字稿如下:

梁慧琪:一啲專業嘅人士去輔導啦,或者係我哋為佢提供一啲輔導,就已經可以足夠。我哋都會視乎個情況。咁而同性戀亦都唔係每一個人嘅需要都一樣啦,咁基本上就係按返佢哋個需要,我哋為佢提供佢需要嘅輔導。

(翻譯)

(1:32) 問:咁係咪即係話呢啲同性戀嘅學生係冇……佢哋唔識得自己去…去…去知道自己嘅性傾向係邊度。係咪佢哋自己都唔知㗎?

(01:46) 梁慧琪:其實有一啲青少年佢可能同同性朋友比較好,唔等如佢係一個同性戀。其實同性戀呢,按呢個叫做DSM-5呢本書,係一個,ER,喺我哋叫做心理學啦,係一個……一般精神科醫生……醫生去用嘅一個診斷嘅書,咁佢係有一啲嘅描述嘅,而我哋一般嘅輔導員呢,佢並唔係一個呢啲咁樣嘅精神科醫生啦,PSYCHIATRIST,所以我哋唔會去定呢樣嘢囉。但係佢心理上嘅需要呀,佢有啲咩,我哋係會提供一個支援同輔導。包括如果佢家長需要,我哋都會。

(翻譯)

(03:26) 問:頭先提到話或者會轉介畀其他嘅部門,咁會係啲咩部門?

(03:34) 梁慧琪:其實究竟佢係唔係同性戀呢,係需要一個叫CLINICAL DIAGNOSIS,咁所以,ER,會轉介去呢一方面嘅…嘅…ER臨床……

(03:50) 問:醫院定係……

(03:52) 梁慧琪:或者醫學嘅人員,即係人哋譬如精神科呀咁。

(翻譯)

(04:13) 梁慧琪:或者係簡單講,即係一啲臨床心理學家囉。因為我哋係唔會做呢個診斷嘅,但佢一般嘅需要,心理上嘅需要我哋係會提供一個支援。

(翻譯)

(04:40) 問:教青局認唔認為同性戀係一個病嚟嘅呢?

(04:45) 梁慧琪:我諗我哋唔係去睇呢樣嘢囉,教青局係做一啲教育同預防嘅工作。倘若有學生喺呢方面有需要,我哋係會去輔導佢,我哋唔會喺呢方面做一個……

(翻譯)

(05:21) 問:咁但係點解教青局認為,ER…譬如……

(05:24) 梁慧琪:如果佢係需要一個診斷呢,即係我哋唔係去做診斷嘅,如果佢需要一個診斷,我哋會去轉介呢方面啦,但係即係如果佢係有一啲特別需要做一啲臨床輔導啦,咁我哋會轉介囉。

(翻譯)

(05:52) 梁慧琪:但係呢個唔係我哋重點囉。我哋嘅重點,其實教青局學生輔導呢,我哋係幫助學生佢可以順利就學,所以如果佢嘅呢個性傾向會影響到佢學習,我哋會去幫佢囉。

(翻譯)

(06:43) 問:咁點解教青局要將呢啲…ER…

(06:46) 梁慧琪:倘若佢有需要……

(翻譯)

(06:58) 梁慧琪:其實有啲青少年可能佢曾經懷疑過自己有同性戀嘅傾向,但係當佢遇到異性嘅時候,其實即係佢有另一……即係係佢成長嘅過程囉。我哋嘅工作主要係去輔導呢一方面啦,咁但係如果佢有一啲比較深層次嘅需要,我哋就會去轉介囉。

(錄音結束)