文化局今日上午舉行「荔枝碗船廠片區保護及活化專家說明會」。會上有市民提出，荔枝碗能否再有一艘船，造船、修船可否再次在荔枝碗上操作。其中，澳門造船工會理事長梁燦日認為，「如果邊個官員夠膽話我哋造船啲工人做唔到嘅，我第一個企出嚟講：我哋有能力造到出嚟嘅！」
「荔枝碗船廠片區保護及活化專家說明會」邀請內地清華大學建築學院副教授劉伯英、香港大學建築系教授王維仁，以及澳門城市規劃師林翊捷分享不同地區工業遺產修復活化的案例，並為荔枝碗船廠片區在保護和活化、歷史文化延續、未來規劃方向與修復等多個方面提供意見。
海港歷史文化協會會長陳逸鋒
提問環節時，海港歷史文化協會會長陳逸鋒也有提問，船廠活化後應否放置當年造的船。又提到，現時港澳的漁船百分之一百有內地牌照，此牌照規定，木製機動船使用年期是三十年，即荔枝碗當年造的船將陸續被淘汰，所以如認為有需要把船保留，政府需要開始着手準備。
荔枝碗村民呂女士
荔枝碗村民呂女士亦表示，船廠保育而言，在荔枝碗再放一艘船，重現工藝，可有助承傳歷史文化，又認同嘉賓所言，要盡快保護和清理地方、打開圍欄等。「整得返就整啦。我哋喺度住啲居民同遊客，都好希望有返保育、文化、歷史嘅村喺度。」「啲颱風都就嚟嚟，希望盡快搞好佢。」
三位說明會嘉賓都支持在荔枝碗再放置船。澳門城市規劃師林翊捷亦表示，希望無論是荔枝碗造過的船，或其生產過程，或者維修工作，某部分依然可以繼續在那裏操作，「其實是一個最好的結果」。香港大學建築系教授王維仁認為，把船重新放在荔枝碗的建議非常好，可作展示之用，甚至可在荔枝碗船廠作非常前衛的策展，「澳門就可帶領中國、全世界，畀人睇，可以用呢個方法改變我哋環境。」清華大學建築學院副教授劉伯英，有艘船是最好的，是「它成就的表現」，至於修船、建船過程的展示，對於工藝傳承亦很有意義。
由於說明會各環節的時間有延遲，大會在最後的現場提問環節讓五位參與市民發言後，宣佈說明會結束，但這時澳門造船工會理事長梁燦日仍爭取機會發言，直言「我係造船業嘅，如果唔畀我講嘢，我覺得今日個說明會係唔啱嘅。畀個機會我。阻大家一啲時間。」
梁燦日表示，對於說明會中有提人到能否再在荔枝碗造船或維修船隻，他認為現時如沒有政府資助，很難重新造一艘船，又提到觀光塔下有一艘木船，正是由荔枝碗船匠所造，「民間都可以做，點解我哋政府唔可以造？香港人哋有隻船，喺維多利亞港遊船河，嗰隻都係木船，都係澳門街造嘅，點解我哋澳門街做唔到？」又指澳門造船的歷史及文化深厚。「如果第時路環荔枝碗冇造船嘅文化，我覺得有種缺失喺度。」希望政府保留一部分船廠講述造船文化，例如將造船工具、文件等呈現於市民眼前。「剛才有位先生都講，我哋造船啲工人五十幾歲了，如果我哋喺呢幾年裏面，如果你哋都唔叫我哋做返啲嘢，我哋亦都無能為力。」又指如有官員「夠膽話我哋造船啲工人做唔到」，「我第一個企出嚟講：我哋有能力造到出嚟嘅！」