政府在公開諮詢《民防綱要法》，建議設立「虛假社會預警罪」，當在緊急預防狀態或更高狀態下，故意造謠或散播謠言者，最高可處3年徒刑，有關建議引起社會爭議。律師飛文基認為，有關法律一定要清晰，否則，政府好有可能侵犯言論自由以及私隱。他又認為，政府需要建立中央系統發佈資訊，相信能更有效杜絕謠言散播。
飛文基表示，越來越多人依賴網絡溝通，更有一些特別的語言，如果不習慣上網溝通，好容易會產生誤會，甚至變了謠言。「讀歪咗個符號，係理解方面已經有問題，一路滾落去，原本就無嘢，可能只係開玩笑，一路滾落去就變咗係謠言。」
飛文基認同謠言需要提防，因為在特定情況下，散佈謠語可能會對社會產生恐懼心理。但法律若果不清晰就會產生好多矛盾，甚至好容易就侵犯言論自由和私隱。「乜嘢叫做謠言？從乜嘢角度睇係散播謠言？從咩渠道一般情況係ok，依家呢個特別制度又唔係十分ok。一般市民係咪要撟埋手等你(政府)消息先？無可能架嘛。」
他認為，政府需要建立中央機制，向市民統一發放準確的消息，亦要清楚什麼時候宣佈進入所謂的「緊急預防狀態或更高狀態下」，甚至要有指引教導市民什麼應該做，什麼不應該做，否則，只增加「虛假社會預警罪」會有好多問題，「因為灰色地帶好大，呢個法律的出發點係要好特別情況，係個種情況下和條件先可以執行到法律。落實係點就係問題。」。
