「幾多老友今朝嚟探我。我冇開聲講，幾多老友嚟探我……我自己覺得……對佢哋唔住，冇服務佢哋到最後，我對佢哋唔住。」「彭記」老闆大哥雄說。
桃花崗「彭記」大排檔、德姐成衣，將於今日結業。不少「桃花崗之友」特地到此話別，眾人大嘆不捨。「彭記」老闆大哥雄表示，有朋友今日專程來訪。德姐與大哥雄都表示，對於結業深感無奈，並多謝街坊多年支持。
「彭記」大哥雄
記者今早到桃花崗時，彭記已在收拾。大哥雄表示，在桃花崗擺檔幾十年，深感不捨。「佢哋都冇得嚟幫襯，冇得食咯，冇得嚟探吓阿叔咯。最多（一齊）去飲茶、講電話，冇得喺度坐，冇得叫吓UNCLE咯，咁點搞呀？」「捨得就唔捨得……幾十年……三十幾年喺度，何來捨得丫……任何一個人都唔捨得。」
「多謝街坊幾十年幫襯我，關照我，開開心心過咗幾十年。多謝你哋。」大哥雄說。
彭記與王先生（右二）合影
從珠海來探望大哥雄的遊客王先生表示，知道彭記要結業，特地來訪。他表示，約四、五年前開始幫襯彭記。「次次嚟（澳門）都嚟呢度食嘢，嚟呢度飲咖啡，嚟親澳門我都要搵大哥雄，都要過嚟飲返杯咖啡。」「大家坐埋一齊傾吓偈，吹吓水，冇咩約束，大家坐櫈仔咁樣，唔似茶餐廳。」
「第時過澳門都唔知去邊度。我嚟親，第一站肯定係大哥雄呢度。」
德姐
布販德姐亦表示，多謝街坊多年支持，「佢哋真係好有心。」現時德姐尚有少量貨品，準備送予親友或自用，或捐去慈善機構。對於要離開桃花崗，德姐坦言好無奈。「好無奈，不過算啦，我都做咗57年喇。」又指，曾想過政府可利用地段加設公共設施，包括車位、老人設施等，「不過呢啲都成泡影啦，係『發噏瘋』，希望啲地產商有良心啲啦，價錢唔好咁貴賣畀啲市民。」
