澳門土地資源稀缺，尤其是北區的社區設施嚴重不足，狗場的再利用規劃成為各方勢力必爭之地。城規會委員陳德勝表示，狗場規劃再利用在社會引起很多爭議論，根本問題在於政府一直都沒有規劃以及缺乏公平性。澳門以往一貫的作風都是「講關係，講大聲，邊個大聲就俾邊個」，但社會需要進步，政府在有關規劃上必須遵循公平、公正、公開的原則，優先解決社區的迫切需要，認真聽取社會意見，「始終都係公家嘢，用既係公帑，公平係好重要，市民有權監察，唔係你話點就點。」
社文司早前表示，計劃未來在狗場地段建設4間學校，其中包括一所特教學校，以解決北區裙樓學校問題。但日前運輸工務司在立法會上則稱，有關規劃仍在研究中，建三間學校還是四間學校，仍是「言之過早」。陳德勝表示，政府跨部門合作一向被批評成效低下，而今次更讓人質疑兩個司完全沒有溝通，令社會誤以為政府已有定案。
陳德勝說，作為城規會委員，卻對有關規劃完全一無所知，只能透過立法會的口頭質詢才得知少些資訊，他對此十分感觸。陳德勝支持政府的「藍天工程」計劃，但資源分配上，要做到公平公正，「不要講聲大，不要講關係，讓真正有需要的學校得到支援。」
然而，狗場地方不大，他質疑︰「咁細的地方點起四間學校呢？又要有陽光，有啲議員又話要有球場，又要有泳池，又要有社屋，乜都擺曬落去。政府係咪可以滿足所有意見就叫城市規劃呢？個笪地唔係一望無際喎！現在北區裙樓學校環境惡劣，係咪優先俾佢搬入黎呢？還是俾外邊，牽涉到交通問題。仲話要有一間特殊學校，日後無障礙設施的設計都係要有清楚的規劃。」他批評，政府最大的缺失是一直以來都未有總體城市規劃，「回歸十八年，有啲情況係唔值得原諒，政府要有承擔，好多嘢都係議而不決，決而不行。」
陳德勝認為，政府是有心做好狗場再利用規劃，但心胸必須坦蕩，讓市民及傳媒更了解政府想法和佈局，並多聽社會意見。他認為，政府必須先將有關規劃提交到城規會以及都更會作討論並達成共識之後，再審慎作出決定。否則，「起完四間學校出黎，原來好擠逼，但城規會會背書，一定上黎通過，到個時我哋先講有咩用呢？YES有問題，NO有問題，因為之前唔知係乜嘢材料，黎到YES定NO呢？話NO，你又話反政府，話YES，背書之後，原來唔得既，啲學生、家長會罵，仲衰過以前，咁點算呢？」
