氹仔花城鴻圖偉業大廈商場業權糾紛持續多年，一直未有平息。月初，發展商派人到商場拆走大廈管委會裝置的廣告板，管委會主席劉錦釗在場錄影期間被發展商馮志強推倒在地不適送院。事後，管委會召開記者會，批評商場內的百佳超級市場多年來都無交管理費，發展商馮志強多次要求其他商戶離開，批評馮志強「大霸道」。而馮志強當日亦在報章上刊登廣告，重申自己為商場業權人，管委會須在時限內拆除未經發展商同意安裝的廣告及舖位，否則會清拆並追討相關費用。管委會與發展商中寶發展公司各執一詞，事件至今仍未獲解決。
馮志強今日出席中總國慶酒會後被記者追問業權糾紛時指，大廈住宅及商業部分的業權各自獨立，不能混為一談。無論商場出入口、逃生出口、消防、電機等都是分開設計的，業主管委會無權管理商場部分，更無權將商場空間出租予其他人。業主批評發展商用鐵鍊封鎖「佢哋嘅地方」，馮志強反批：「咩佢哋嘅地方啊！呢度係商場出入口，佢係入邊間舖位租畀人，合唔合理？嗰度係緩衝區，好多人出出入入。」又指事發後雙方未有討論過相關問題，「邊有得傾，呢啲牛皮燈籠，傾嚟做乜。」
馮志強亦批評，大廈管委會出租舖位牟利，與管委會的職權不相乎，「管委會成立嘅目的係乜嘢？係對管理公司有監管，唔係攞嚟牟利嘛。你將我嘅哋方攞嚟牟利，點講得通？」馮志強更指，若果管委會繼續在商場範圍設置廣告燈箱及出租舖位，必定會再度前往清拆「你咪搞囉，我又拆。我份人就係：受軟不受硬，你硬我仲硬。（記：擔唔擔心形象受損啊？）我又唔覺得喎，據理力爭，有乜邊個怕邊個。」
鏡湖醫院主席過大海做手術 信唔過自己醫院？
另外，早前有報章報導，身兼鏡湖醫院慈善會主席的馮志強竟然不「幫襯」自己醫院，反而到香港養和醫院求診。馮志強指，由於本澳的心血管手術病例少，手術室醫生「生手生腳」。反之香港的心血管手術「工多藝熟」，故此便到香港做心血管手術。被問到有小病小痛時又會否到鏡湖求診？馮志強笑言：「小病就去便民（藥房）叫個藥劑師執藥就得啦！（記：你自己都信唔過鏡湖？）你自己講㗎！我無講啊！」
