政府「先斬後奏」豪花640萬重整龍環葡韻引起社會熱議，澳門土生協會理事長飛文基說，部分土生葡人對此感到憤怒，「政府做任何嘢都有諮詢，點解涉及土生文化的項目都唔同我哋講聲？」他認為，龍環葡韻的幽靜氣氛在澳門已經絕無僅有，澳門即使要成為世界旅遊休閒中心，都不能每個地方都套用「大三巴模式」。他說︰「三十年前想去靜啲的地方就去大三巴，現在已經無地方揀，大三巴已經人山人海，係咪要將大三巴咁『歡樂』氣氛搬去龍環葡韻，咁就叫休閒呢？」
飛文基表示，發展休閒旅遊都有很多種方式︰「玩下千秋，望下海都係休閒，舒舒服服面對大自然都係休閒，可否用大自然的環境，聽下雀仔叫聲，作為一個賣點呢？ 像龍環葡韻這種優雅平靜的地方，澳門真係已經冇啦。」他憶述，自己小時候曾在該處游泳，當年由澳門過氹仔要搭船，不少澳門人已當作渡假，「可以講成個禮拜」。
文化局從10月起將會在龍環葡韻引入多項文藝表演活動，如街舞、土風舞、寫生、樂隊演奏等等，聲稱不會影響到附近環境。飛文基指出，龍環葡韻對開的濕地生態區有很多雀鳥棲息，以往每年都只搞兩次葡韻嘉年華，正是擔心「晚晚搞晚會，趕走曬雀鳥。擾亂曬整個自然環境之後，係咪要填海起經屋？係咪要咁樣計劃？」
飛文基說，龍環葡韻的特色不在於那幾間小屋，而在於葡式建築與自然環境形成有機的整體。「填平個湖起建屋，咁我哋會唔會開心呢？當然好多團體會好開心，我哋又成功爭取到幾多千間經屋！」但一般市民會感到可惜，因為這僅有的文化特色已被抺殺。
政府打算重新規劃該處的幾間小屋，又要引進葡式餐飲、文創展館等等，現時正進行裝修，社會有意見批評過於商業化。飛文基表示，歷史文物就如同「古董」，「你唔會用古董斟水架嘛，你無端扑爛咗佢，生活上唔會改變，但最有特色既嘢就無咗。」龍環葡韻是澳門的文化遺產，保護文物是政府首要的責任。「點樣用啲屋仔，係咪要好似議事亭前地咁樣先叫保護文物呢？大大個商標冚住曬座建築物，係咪咁樣就叫做保護文物呢？要問返司長咁樣係咪最好。好多嘢唔係呢間建築物自己有無歷史價值，而係人哋點樣用先有歷史價值。」
另外，近期政府不斷拆毀多座葡國特色的建築，有意見質疑此舉目的是「清洗文化」。飛文基認為，澳門要有明確保護文化的政策，這需要社會接受澳門的歷史，包括過去幾百年的殖民史，澳門獨特的歷史文化底蘊正在於中葡文化共融，然而，現時仍有不少人一提到葡國文化就很反感。他認為，澳門的歷史文化，不可能抹殺葡國特色。
相關報道︰
龍環葡韻翻新工程惹議
吳衛鳴：640萬元用於基本修復工作
640萬重新打造龍環葡韻
高天賜憂破壞多於建設
