即時報道
即時資訊、特別報道、即時評論。

賭場禁煙企硬 譚司:為市民健康唔介意賺少啲

即時報道

文:論盡採訪組

時間:2015年04月1日 15:15

【譚司駕到】除左「光輝五年」夠震憾,早前「譚超人」更斬釘截鐵宣佈2016賭場全面禁煙,連吸煙室也不會設一個。各大博企先後開聲叫苦連天,有的說賭收可能跌一成,有的抱怨仲嚴過新加坡。今朝「澳門講場」上,有多名自稱不吸煙的聽眾致電為賭場求情,指連吸煙室都無「唔夠人性化」,又擔心賭收可能下跌、影響民生云云。但亦有聽眾致電撐譚超人的「百日維新」,敢向既得利益者挑戰,鼓勵他堅持立場:「司長,希望你成功唔好成仁,而家仲係晚清時代,仲有好長既路要行。」

_DSC4213

譚俊榮節目後向傳媒笑言︰「今日我俾人圍攻,但絕對不會影響我的立場。」他回應聽眾時答得也很決絕,指早前的民意調查結果顯示,全澳8成市民贊成全面控煙,即使有吸煙習慣的遊客亦不介意,1成多受訪的吸煙旅客表示,若賭場全面禁煙會考慮不再來。他直言為了市民健康唔介意賺少啲:「澳門一年有三千幾萬遊客,就算有一成幾唔黎,數字都係好細,唔會對稅收有大影響,政府有足夠收入支撐民生開支。但如果因為批准吸煙影響市民健康,付出的醫療代價可能會更大!」 他透露控煙法修訂草案已完成,將交由行政會討論。

自稱不吸煙亦認同控煙的聽眾周先生表示,禁煙政策應「以人為本」,全面禁煙「有啲誇張」,又指政府的調查數據只訪問不吸煙的市民,不夠全面,還應該訪問賭場及吸煙人士。「國外一些機場都有設吸煙室,不會影響到不吸煙的人,這才是雙贏做法!吸煙人士亦唔使走到山長水遠,搞到煙癮發,又呢樣個樣咁麻煩。」他又指,賭收已經不斷下跌,如果再推全面禁煙可能會對賭業有長遠影響。

同樣自稱「自己不吸煙,亦不喜歡別人吸煙」麥先生表示,不影響他人的情況下,應該要尊重別人吸煙的權利。又指賭場是澳門的經濟支柱,賭場禁煙至少也要設吸煙室,「你無理由叫人地賭下賭下就走出去食支煙再返黎賭,乜癮都無曬啦!」他又認為上述周先生的意見中肯,「呢個唔係講玩,關乎澳門經濟體及賭場營收問題。」希望譚俊榮再作深入諮詢研究。

譚俊榮解釋,機場有禁區,旅客不可自由進出,設吸煙室是特例。現時澳門賭場都是中央冷氣系統,就算設吸煙室,二手煙都會影響員工和旅客,因此並不可行。他又反問,今年酒吧、舞廳、蒸氣浴室、按摩院已實行全面禁煙,為何又要讓賭場容許吸煙或設吸煙室?