在澳門，小型公園和廣場的數量雖然不算少，但公共空間的環境營造，以致綠化方式卻越來越「新奇」，有時真假難辨，美醜難分。最令市民另眼相看的莫過於聖心學校門前幾棵用來種爬藤的「鋼管樹」，原來係新式「垂直綠化」。
與文化遺產建築師呂澤強逛公園，才發現公共空間設計大有學問，如何以用家為本，令公公婆婆坐得舒服；點解有些公園「光禿禿」有種說不出的怪？休憩區唔該唔好只得塊空地、幾張凳；路樹真係無價寶，可淨化空氣，又可調節城市溫度。要做個人見人愛的公園，空間設計、城市美學、如何從用家角度出發，樣樣兼顧，真係唔可以亂嚟！
無樹點叫做公園？
呂澤強指出，現時澳門公共空間普遍存在設施、設計不便民，以及管理不足的問題，他以華士古公園為例，「改建前呢度喺一個真正嘅公園，有好多大樹，但係為咗起一個停車場，滿足停車需要就將公園改建，變成依加咁。」現在華士古公園中午時份人流稀疏，主因是公園缺少可遮陰的大樹，塔石廣場、中央公園等公共空間同樣有這問題，「原來公園起好，中午嗰段時間根本用唔到，得個曬字。」
他認為，政府在設計公共空間時往往忽略了使用者的感受，單純從數字角度出發，「政府成日用數字嚟講有幾多綠化面積，依加啲綠化仲發展到用『鋼管樹』嚟做，咁第日連燈柱整啲植物都可以話綠化啦？」不過他認為，即使公園地下要建停車場，亦並非不可能種樹，「皇朝宋玉生廣場就係個好例子，當年規劃兩邊有商住樓宇，中間係綠化帶，經過十幾年啲樹都好大棵，又可以係觀音像那邊引啲海風入嚟，即使係烈日當空都好清涼。」
截至二○○九年，澳門總綠化面積為七百七十萬平方米，約佔全澳總面積四分之一。但這表面數字的背後實際情況又是怎樣？呂澤強批評，現時公園內的所謂「綠化」，其實只是做花圃、種灌木等，大樹相對較少，「其實種樹除咗好遮陰，改善空氣質素，仲可以用來調節城市溫度，控制氣候，改善『熱島效應』等環境問題。」 在建築師眼中，樹真是一樣寶物。
呂澤強建議，葉挺故事門前小庭院可化身社區休閒空間
社區公園唔使開廿四
至於公園的管理問題，呂澤強指出，澳門城市密度高，住宅與公園的距離太近，加上大部分公園均廿四小時開放，沒有關門時間，「深夜啲人係度開party又投訴唔到，朝早啲人晨運，六點未夠就開大音樂跳韻律操，變咗會影響附近居民休息。」曾經在法國留學多年的呂澤強說，巴黎有很多大公園，每個社區又有小公園，社區公園有規定開放時間，晚上會「落閘」，保障周邊民居晚間不受滋擾。
歷史建築也可綠化
澳門人居住空間不斷縮小，這時候可以舒展身心的公共空間更加重要。呂澤強認為，澳門愈來愈城市化，不可能再靠如松山、望廈山、螺絲山等「市肺」來提供綠化空間。既然在澳門覓地建公園甚艱難，不妨「因地制宜」，利用現有的世遺景點及歷史建築，變成社區公共空間，「剛剛變做博物館嘅葉挺故居，門前小花園可以俾居民坐下、傾下偈，或者鄭家大屋內既中庭，居民可以係度搞下活動，做下運動。未必一定要係大公園先叫公共空間，呢啲地方都可以好好利用，種多幾棵樹就得！」
澳門舊城難再發展，原本新城填海區在營造優質公共空間上有頗大想像空間，但A區新規劃人口暴增，最後結果如何仍是未知數。呂澤強認為，政府必須考慮得更周詳，唔係「有瓦遮頭」就代表這是一個宜居空間，「新城A區將來有十萬人住，社區設施、交通配套、綠化空間都要做得好先得。」他再三強調，「『綠化』唔係就咁整啲花圃就算，係真真正正可以用嚟遮陰嘅樹。」
除了辦活動，塔石廣場平日人流相當稀疏。
