【新聞解毒】為連任可以去到幾盡？特首候選人崔世安琴日先講完政綱，今日已經馬不停蹄四處拜訪，上午去中總，下午到工聯，仲要去埋幾間傳媒機構，咁操勞唔知佢痛風好番未？
商界座談會上，原本以為請人難、舖租貴等火熱議題無得走雞，殊不知大半時間用黎高度讚揚政府既「英明領導」！
澳博老闆娘梁安琪認真俾面，琴日今日連聽兩場，一啲都唔怕悶！佢最關心媽閣到灣仔既河底隧道究竟有無下聞？路通財通，到時成個內港生猛番晒，手握該區地皮既娛樂公司自然近廚得食，但崔世安就話內地一直未有回應，他承諾當選後會爭取將灣仔河底隧道納入「粵澳合作框架協議」，再向中央提出申請。
成個座談會都無乜火花，好彩有政壇元老，久未露面既中總永遠榮譽會長吳榮恪搞搞氣氛。之前世安俾人讚忽然變成「乜都得」特首，臨競選成個「生神仙」咁有求必應，吳榮恪就話：呢種講法對世姪唔公平，要幫安安平反！佢話「安哥」細個鐘意扭計，以前先係「乜都得」！吳榮恪話呢種「乜都得」既態度唔適合做行政。只不過「安哥」有今日既成就，除咗佢有「超人」既智慧同努力，仲要依靠「科學施政」同大量調研工作，所以，「安哥」前排話自己唔接受「乜都得特首」稱號，非常之明智。世伯一番說話，即時令安安當堂笑到氣咳。
