1) 今年施政報告你最記得什麼內容？
黃先生（待業）
最記得就係派錢。
徐小姐（家庭住婦，倫敦街住戶）
最記得就係政府話輕軌唔行倫敦街，因為我就住係倫敦街，輕軌係我屋企樓下經過會好大影響。
Terry（大學生）
派錢囉。
張先生（教師）
九千。
李小姐（基層博彩從業員）
現金分享九千蚊。
施先生（退休人士）
派錢啦
陳先生（文員）
九千蚊，增發的士牌。
林小姐（公務員）
人才培養。
黃太（家庭主婦）
派錢，敬老金。
Jacky（中學生）
現金分享、書簿津貼、持續進修計劃。
秦小姐（保險從業員）
現金分享計劃派幾錢。
Penny（待業）
無留意。
張女士（商人）
派錢，免稅，資助中小企。
陳先生（巴士司機）
派錢。
徐小姐（博彩從業員）
最記得派錢同唔輸入外勞荷官。
盧小姐（文員）
無留意。
Mandy（高中生）
記得有派錢，同持續進修。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
2) 你最關注的是什麼方面？滿意嗎？
黃先生（待業）
最關注係就業問題囉。
徐小姐（家庭住婦，倫敦街住戶）
土地政策囉，澳門咁多地擺左十幾年，政府又唔收又唔理，與其擺係度生草養蚊，不如收番攞黎起公屋，唔起公屋起公園都好啊。
Terry（大學生）
派錢啦，持續進修啦，（大學生）學習津貼啦，都滿意嘅。
張先生（教師）
公共房屋，不可能有「丁點」滿意。
李小姐（基層博彩從業員）
關注政府會唔會輸入外勞莊荷，因為如果輸入的話，我地好可能會無工做。
施先生（退休人士）
老人政策囉，搞搞通脹啦。
陳先生（文員）
法律滯後，不滿意。
林小姐（公務員）
唔滿意現時嘅房屋政策。
黃太（家庭主婦）
通脹問題，事關依加好多野都好貴。
Jacky（中學生）
會唔會年年都有錢派。
秦小姐（保險從業員）
樓市，依加真係升得太厲害，搞到好多人都買唔到樓。
Penny（待業）
文創發展，其實唔滿意，好似我呢啲讀完設計出黎嘅學生，要係澳門搵到自己專業嘅工實在太難。
張女士（商人）
政府點樣去幫我地啲中小企業。都算幾滿意。
陳先生（巴士司機）
交通，同有咩福利。
徐小姐（博彩從業員）
關注政府會唔會輸入外勞搶我地飯碗。
盧小姐（文員）
派幾多錢囉。
Mandy（高中生）
會唔會又派錢，同下年會唔會繼續有持續進修計劃。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
3) 過去五份崔特首的施政報告中，你仍記得什麼內容？
黃先生（待業）
其實咁多年嘅內容都差唔多，要講就派錢囉，其他內容其實都係假大空。
徐小姐（家庭住婦，倫敦街住戶）
派錢啦，萬九公屋啦，要打做世界旅遊休閒中心啦。
Terry（大學生）
都係派錢囉。
張先生（教師）
派粒糖，輸間廠。
李小姐（基層博彩從業員）
派錢、公屋、博彩、旅遊。
施先生（退休人士）
年年都派錢架啦，講其他都唔記得，講派錢就最記得。
陳先生（文員）
太空泛，只記得佢派錢。同話萬九公屋，但實際就脫期未達成。
林小姐（公務員）
掩口費用絕對唔會少，利民政策就少之又少。
黃太（家庭主婦）
派錢、福利、醫療劵。
Jacky（中學生）
年年都派錢。
秦小姐（保險從業員）
現金分享，萬九公屋，公積金。
Penny（待業）
派錢，發展文創產業，但係搞黎搞去都搞唔好。
張女士（商人）
唔係好記得囉。
陳先生（巴士司機）
年年都講派錢架啦，其他就唔係好記得咯。
徐小姐（博彩從業員）
都差唔多係嗰啲嘢啦。
盧小姐（文員）
無乜點留意施政報告內容。
Mandy（高中生）
教育，交通，房屋，醫療，環保嗰啲。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
4）最滿意及最不滿意什麼內容？
黃先生（待業）
滿意：其實真係無，因為年年如是，無新意；不滿意：成份報告都係「空口講白話」，其實有好多嘢係前幾年有講過，但係咁多年都無做過啲乜。
徐小姐（家庭住婦，倫敦街住戶）
最滿意？攞成百幾億出黎分比澳門市民囉。唔滿意就，無高官問責啦，即係倫敦街起輕軌搞咁大單嘢，都無一個官員要出黎負責。
Terry（大學生）
最滿意派錢，最唔滿意交通囉，度度都塞車，政府又唔搞好佢，又成日抄牌。
張先生（教師）
最滿意：錢多，最不滿：人傻（缺長遠規劃）。
李小姐（基層博彩從業員）
我幾滿意啲福利，依加啲嘢咁貴，政府唔出多啲福利嘅話，生活都幾艱難；唔滿意樓市，依加啲私人樓咁貴，我地都無錢買樓，政府又唔做嘢去壓低啲樓價，叫我地點買？
施先生（退休人士）
派咁多年錢都無用啦，搭巴士愈來愈難，買嘢愈來愈貴，睇醫生又有排等。
陳先生（文員）
最不滿意政府無承諾，所有施政都好空泛，無目標。
林小姐（公務員）
最滿意輕軌走外街，最唔滿意政制改革原地踏步。
黃太（家庭主婦）
最滿意啲福利啦，有錢派幫補下都好啊嘛；唔滿意交通，之前發咁多的士牌都係咁難截車，發多幾多都無用。
Jacky（中學生）
最滿意梗係派錢啦，最唔滿意咪交通囉。
秦小姐（保險從業員）
現金分享。
Penny（待業）
相信都無乜人唔滿意派錢架啦。你話唔滿意啲乜，交通，房屋囉。
張女士（商人）
最滿意係支援中小企嘅措施，唔滿意依加租金咁貴，政府都仲唔出招穩定樓市。
陳先生（巴士司機）
最唔滿意就係交通，依加啲車愈來愈多，以前渣巴士都話輕輕鬆鬆，但係依加就好似過山車咁左閃右避，咁搞法整多幾間巴士公司都無用啦。
徐小姐（博彩從業員）
最唔滿意就係政府無照顧我地啲夾心階層，公屋又輪唔到，私人樓又咁貴，依加通脹又咁犀利，派錢派幾多都哂氣，派樓好過啦。
盧小姐（文員）
都幾滿意派錢嘅，起碼多舊錢洗下。唔係好滿意啲差人成日抄牌，政府又唔整多啲車位。
Mandy（高中生）
最滿意就係持續進修計劃，比五千蚊去學嘢，好有用。唔滿意啲巴士服務，又少車又多人搭。
＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝
5) 對崔世安及五位司長連任的信心和支持度如何？
黃先生（待業）
其實崔世安就肯定連任啦，我地澳門市民都無得選，五個司長就唔知啦，我都唔係好識佢地。
徐小姐（家庭住婦，倫敦街住戶）
老實講，有無信心、支唔支持都無用啦，我地又無得選啲官員出黎嘅。
Terry（大學生）
都唔差嘅，佢地衰極都話肯派錢。
張先生（教師）
無普選，呢題無意義。
李小姐（基層博彩從業員）
特首同啲司長應該都會連任架啦，我地都無得揀。
施先生（退休人士）
我就肯定唔鐘意個政府架啦，但係都無計啦，我地啲升斗市民都無得投票選佢嘅，唔鐘意都要硬食架啦。
陳先生（文員）
從來唔支持非普選產生嘅政府，小圈子政府唔代表我。
林小姐（公務員）
唔支持唔係由普選產生嘅所有嘢。
黃太（家庭主婦）
我無乜所謂啊，只要政府福利好，為澳門人做嘢，我就支持架啦。
Jacky（中學生）
除左特首之外，其他五個我都唔係好識。答唔到你。
秦小姐（保險從業員）
支持。
Penny（待業）
無所謂啦，支唔支持都唔到我地話事架啦。
張女士（商人）
政府都做得唔錯，但係樓市就真係要搞搞佢，唔係我地都唔知要點生存。
陳先生（巴士司機）
個特首淨係識吹水，佢啲下屬又做唔到嘢，點會有人支持佢地啊。
徐小姐（博彩從業員）
個政府都廢嘅，邊比到信心比我地啲小市民啫。連唔連任，我地都控制唔到啦，佢都係幾百人選出黎渣。
盧小姐（文員）
無乜所謂。
Mandy（高中生）
支持連任。
