最新一輪經屋抽籤僧多粥少，4萬申請者只有1900個幸運中獎，推售單位大部分是一房廳的「豬頭骨」，非核心家團在新遊戲規則下「中獎」機會微乎其微，市民大呻搵笨。特首崔世安今日出席司法年度開幕禮後繼續封口，對週日的經屋大遊行及「海一居」收地風波一概不回應。
運輸工務司司長羅立文的回應同樣令人失望，指未知何時再開新一輪經屋申請，之前23幅刊憲收回的閒置地仍在司法上訴階段，政府一幅都未到手，「唔開新申請係因為無地，無地又點起樓？如果你送一幅地比我，我會起。」他又指不擔心週日會有很多人遊行，「示威係一個權利，大家有唔同睇法好正常。」
而房屋局及工務局今早出席電台節目《澳門講場》撲火，稱正規劃7幅土地預計可建4千幾個公屋單位，但一樣係「望梅止渴」。房屋局強解釋，要先解決土地利用、規劃及設計問題，又要公佈經屋數量、地點、單位間隔等資料。現時公屋供應「有規劃但因條件未成熟」，講到最後，都係未知幾時會再開隊。
當局表示，現正規劃的林茂塘、祐漢及黑沙環發電廠地段，4幅土地預計可建1400個公屋單位；氹仔則有3幅地，可建約3000個公屋單位。其中林茂塘一幅地皮進度會較快，已進入設計階段，預計可建200個公屋單位，但未決定是社屋還是經屋。
