行政長官岑浩輝近日發佈任內首份施政報告。對於本年度施政報告內容，市民有何觀感、是滿意或失落？本媒記者在本（4）月16日在氹仔與市民聊聊對這份施政報告想法。
有市民關注本地物價過高，而長者福利增幅不大，有部分生活依然困難；有市民指育兒津貼對有生育打算的家庭而言「有驚喜」，是筆不少的補貼，但育兒鼓勵措施力度未大到願意再生多個小朋友；亦有市民指對比鄰近地區，養老金仍是過低。
氹仔居民：物價貴、養老金加得幾蚊
享受返澳門人福利係應該
已退休的氹仔居民文女士對於本年度施政報告不是太關心，「唔係好識，只有略略睇下，哦，原來有一萬喎、加咗養老金一千喎，就係咁。印象就係加咗錢，」對長者福利提升有印象，但實際加幅不大。
「養老金增加咪得嗰幾蚊，加得唔多，冇咩作為。……嗰兩三千蚊冇咩用㗎，澳門乜嘢都貴。你兩千幾蚊夠唔夠一個月使呀？只不過係幫補下啲消費，真係旨意嗰兩千幾蚊，死得啦。澳門乜嘢都貴。」
文女士觀察到，自從政府派發醫療券、消費券之後，物價、睇醫生費用連年上漲，但少見回落：「屋企對面醫生加到而家300幾蚊一次。……自從有咗啲咩金咩金、消費卡、醫療券，啲物價就貴咗好多啦。醫療券得嗰600蚊，你一年都唔會睇2次醫生咁少啦。」
提到最近進行的「大獎賞」，她表示只抽到10蚊、20蚊，「冇用㗎，幫助唔到。」若抽到大面額，更要消費更多，「你慘呀，嗰個禮拜畀你抽到200蚊，仲死，要買600蚊嘢，突然間，係咪先，畀你抽到300蚊仲死，要買900蚊嘢，一個禮拜，900蚊買咩呀你話？」
物價高企，樓價亦高企。文女士指雖然自己沒有住屋壓力，但眼見年輕一輩「慘」，難買樓上車，「首期都要畀百幾萬，供都供唔起啦，一個月供萬幾蚊，而家啲收入咁低。」
她留意到網上有言論指現金分享應加條件，規定常居澳門才能獲派，文女士亦認同。「好多人係揸咗澳門身份證，但冇喺澳門住嘅，又冇納稅，又冇乜嘢。……我哋做嘢做幾十年，納咗咁多年稅，我哋正式係澳門人，享受返澳門人福利係應該㗎嘛。但係政府思唔思考，唔關我事。」
氹仔居民：育兒津貼係「驚喜」
未打動再生多個
傍晚時分，氹仔居民潘小姐剛好接小朋友放學路過。她表示自己很少關心施政報告內容，「冇乜太緊張呢方面，有少少隨遇而安，肉隨砧板上，又覺得冇咩所謂，就算有咩政綱又好咩都好，都好似自己又唔會改變到啲乜嘢。」若到政策真的出現「太離譜」的事才會再多留意，可能也會多了澳門人的聲音出來阻止。
潘小姐從身邊人討論之中留意到今年施政。「感覺上都OK啦。」認為新增的每月1,500元育兒津貼有驚喜：「如果自己小朋友喺嗰個period入邊有錢拎，都會興奮。但又未至於覺得因為有呢舊錢，但本來冇決定生嘅時候改變咗想生。」
她表示，津貼額度「係唔少錢」，但未打動自己想生多個，「又唔會一直派，3歲後要靠自己，錢又唔會用得少咗」。措施有利於本來就有生育計劃的家庭，或可幫補奶粉錢、尿片錢。
氹仔居民：講出嚟要做得到先有用
記者遇到正在陪同小朋友玩耍的陳先生。已退休的陳先生稱自己有了解今年的施政報告，對長者養老金增加較多留意，但認為比對其他地區，養老金仍是過低。「我哋都係關心啲福利，有所升都係好事，現金分享、育兒、醫療各方面……事實係比之前好少少，又唔係好好多。都OK啦。」
他又指，新任特首才上任不久，總要有個過程，施政報告內容都可以接受。「同左鄰右舍相比，（福利）都比較好，做人要知足。」但強調「講嘅嘢到時要兌現」。「施政講出嚟要做得到先有用。你都知啦，賀一誠在任講講講，講完就走人都冇實現，而家到佢啦，唔好佢講完又話走人。」
陳先生關注長者福利應再提升，對比內地，本澳養老金金額仍落後一大截，而物價貴，長者若無積蓄、也無子女幫補，則很難生活，「單純靠退休金喺澳門好難捱……你知道有啲人六七十、七八十歲還要做工，無計，靠退休金係頂唔住。」
此外，在本地醫療保障也不完善。陳先生提到，本地醫療「做個檢查還要排死你，等個報告等成十日八日，遠遠比唔上大陸，人哋一去到住院，報銷八九成，起碼檢查什麼速度快好多」。除了公共醫療，整個政府的辦事效率也應提升，例如辦證件，但現時已好過以前好多。
他亦留意到橫琴單牌車北上等新措施，亦建議週末「澳車北上」開更多名額。
