澳門經濟向好，沉寂多時的工運近年突然捲土重來。新崛起的「博彩最前線」成為社會上最矚目的一股新興力量：去年雙十過萬名荷官大遊行，要求立法禁止輸入外勞荷官；年初一場不起眼的「暗戰」，透過團結員工按章工作和內部談判，成功迫使英皇賭廳同意員工的補償訴求；爭取政府落實全面禁煙，發起一場又一場的街頭行動，狙擊在立法會口出狂言的「醫生Chan」，大快人心！六月起，組織連場遊行集會包圍威尼斯、星際、新葡京，向資方發出員工憤怒的呼聲，即使博企見勢色不對悄悄局部加薪、派股票、發獎金也未能淋熄員工的怨氣和怒火。
帶領「博彩最前線」的慓悍小將楊晚亭，今年只有28歲，從參與社運到自行組織工會，由開頭無人無物到現在一呼百應。棄打天空戰，先做好後勤動員，令他把握到群眾運動的黃金時機。面對不斷的抹黑、打擊、分化，如何自處？對付「無間道」他又有哪些過人的策略？ 進擊之小團體要向巨人施壓，他是否擔心會遭遇報復？來屆他是否如傳聞所講再戰立法會？今期我們將了解楊晚亭的「抗爭哲學」。
記：人紅自然是非多，去年十月兩次荷官大遊行後，網上不斷有人攻擊你，說你是撈政治本錢，要為四年後的選舉鋪路？
楊：這一套打手最常用。不是說你為了參選，就是說你為了幾萬元，其實一聽就知不合邏輯！如果將搞工運的時間放在工作上、賺錢上，回報肯定不只這幾萬元。這不是可恥，而是好可笑。其實大部分同事都認為參選無問題，只要當選後立場夠堅定，代表到投票給你的市民，他們都會好支持。
記：那即是會繼續「去馬」？
楊：好多同事問過我，我都直接答佢，不會兜兜轉轉：係！四年之後我一定會選！我一定會自己另組一隊參選。如果入到立法會可以凝聚更多賭場員工的力量，加大與博企及政府談判的籌碼，我會照直跟他們說。工友都好明白，我幫緊佢地，而家有人抹黑我、攻擊我，咁即有人要搞禍佢地！所以，打手用這些來對付我，可以說沒甚麼影響，也不會當一回事。
記：有無人潑你冷水？
楊：試過好多，但不記得了 (哈哈) ，這是必須經歷的過程。你身邊總有人支持你，也會有人潑冷水，視乎你的心態。有人會跟對方「拗到底」，我會用第二種方式。最常聽到人說：你搞咁多嘢都無用架啦！都無人關注！其實我們應該反思，不是他們政治冷感，而是他們到底有沒有機會參與？我們會檢討如何鼓勵那些不關心的人、潑你冷水的人，重新喚起他們的注意。有些人到後來都會支持我，大家一起參加行動。
記：會否覺得澳門人心態好奇怪？靠蛇齌餅糉無問題，你不是大富大貴參選，就覺得你搞政治想搵著數？
楊：其實好正常，傳統社團文化已經「入晒腦」，好多人覺得你想擴大組織，然後攞著數。但時間會改變人，澳門人的心態開始不一樣了，他們會留意你到底做了甚麼？觀察你的立場和路線再去判斷，這些都是需要時間改變。
棄天空戰 後勤動員行先
記：參選立法會的經驗，對你搞工運有無幫助？
楊：民主派比較著重民主意識，我的做法可說是「貼地」少少，而且會先做好後勤和組織、架構。我們有部分工友在內地成長，他們的思想一向接受大陸那一套，不可能一時間就跟他們講民主，要他們全盤接收。好像明明不喜歡歷史，你卻偏跟他說這個，無興趣他們永遠聽不進去。我會從最基礎、最生活的層面開始說起，至少要找到溝通方式，他們接受你，才有機會跟他們說一些「離地」嘅嘢。
以前好多同事說：你返公司搞咁多做乜？食幾多著幾多、公司出幾多糧都係整定！搞黎都無用！還有一句：事不關己，己不勞心！這句以前好流行。但這一、兩年真的有些變化，當有事發生，他們未必會參與，但起碼會問一句：點解會咁唔公平？使更多人從完全冷漠到提出疑問，這是一種進步，也是我們努力的目標。
對付無間道：來者不拒！
記：搞工運最難是否防止外部滲透和分化？
楊：我想社運滲透不會太嚴重，始終涉及利益無咁大。社運對抗的主要是政府，但工運要對抗博企。從資方角度來說，搞工運即係搞佢盤生意，自然會想很多辦法對付你。資方都會組織好多人幫自己講說話，甚至找人做「無間道」。
記：有無試過被人出賣？
楊：試過好多次，搞工運一定預咗，以後也會陸續有來。有些可能一開始就為了滲透，有些原本是跟你同一陣線，後來可能迫於公司壓力，令他掉轉槍頭來「造你」，你永遠不會知道。我會用一種比較樂觀的心態看待，你幫得到手，那怕你是敵人都好，你幫住手先(哈) ，我就是這種心態。
如果你長期去猜忌誰是「無間道」，又驚呢個喺、又驚那個喺，如何擴大自己的組織？始終一定會有這種人，問題是比例多少。既然你是否刻意預防都一定會有這種人進來，那何必要預防？不如快些擴大規模，他們的比例自然會被沖淡。如果大部分人都支持你，這三幾個「無間道」都不會有甚麼影響。
記：所以現在的策略是一於打開門做生意？
楊：哈~ 之前我在群組發通告已經直接寫：歡迎線人(間諜)加入！你收料做乜都好，無乜所謂，但請不要破壞秩序！無必要猜忌太多，若是這樣根本無俾機會人地同你溝通，或者人地個心唔係咁複雜。如果你又忌住佢，只會錯失左俾佢幫手嘅機會。
多才多藝的晚亭會自己作歌、拍片，宣傳他想推廣的理念。(圖片提供：楊晚亭)
楊晚亭直言下屆立法會選舉會組隊參選，希望將博彩員工聲音帶到議會。
威迫利誘？搞工運豁出去
記：第一次上街遊行係幾時？
楊：二○一二年五一遊行，我地透過互聯網組織同事參加，記得當時有百幾個人投票話會來，但最後真正到場只得五個(哈)。我仲整左二十張紙牌，心諗應該夠，衰極都有三、四十人吧？點知得五個！一人拎兩個，再拎埋橫額都幾『論盡』下。剩下的周圍派俾人，當時外界對博彩從業員的印象都不是太正面，甚麼賭場全面禁煙，全部無人肯拎，淨係得番我哋嘅紙牌攤晒係地下，都幾搞笑。
記：點解博彩從業員好似突然硬起來？不怕秋後算帳？因為政府承諾不輸入外勞還是多了幾家公司？可以東家唔打打西家？
楊：其實多人參與，大家都會不怕秋後算帳。你敢炒三幾個，但唔係夠膽炒晒咁多個掛？
記：但得罪公司的話，唔炒都可以搞到你好無癮，無理解僱補錢炒人都得。
楊：以前都有工會同事被公司炒咗。搞工會通常有三種下場：一係炒、停薪留職、一係被公司威迫要做間諜。後來我們也學會保障這些帶頭人，若果一大班同事走出來就不易盯上某幾個。又或者呢間公司協助隔離公司，當一間場要發起行動，就會叫其他場嘅成員幫手，下次佢又幫返佢，我地六間場都有人可以互相照應。
記：有無試過被人威迫利誘？
楊：有試過，但不是博企。(外邊有人找你飲茶傾偈？) 有人發過訊息俾我，叫我小心、檢點啲，又講明那些人已經睇實晒我。有時遊行期間突然會有人走過來，係耳邊警告你：我地收到消息，你呢排唔好叫咁多人出黎！仲要係你面前做一個咁既動作(用手在頸前比劃一下) 。( 係咪國語口音？) 有少少啦。
記：你點睇呢啲「溫馨提示」？
楊：其實你參加工運預咗豁晒出去，有時屋企人都理唔到咁多。另一個角度講，自己都係幾自私，將身邊的事都放低晒，安全問題唔到你去諗。
記：即是有考慮過可能有天被秋後算帳、被報復的人是自己？
楊：係，已經有這心理準備，有時就算做到好忘我，但都會隨時提醒自己這種事隨時可能會發生。如果真的發生了，應該點處理？點樣交待讓你身邊的人知道？這些問題有時都會去想。當我是妄想症又好甚麼都好，可能是發生在我身上或是其他人身上，都要有定心理準備。
記：所以，已經做了最壞打算？無論係份工抑或人身安全⋯⋯
楊：又或者整個桃色陷阱俾你踩，哈～ 甚麼事都有可能發生，總之自己要有心理準備，一旦你甚麼都沒有了，如何令這個組織可以繼續運作，同事仍能團結下去？這個一定要想。
記：咁利誘呢？
楊：曾經有學者向我提出，可以支援場地和資金。話佢地想為澳門做啲嘢，想贊助一些團體：「我地一定俾到錢，只要你開口！」但我無應承。佢話俾場地，我話我地唔係無場地；佢話俾錢，其實都唔需要，我地都有！我地唔係搞到蛇齋餅糉，如果同事支持我地行動，佢地亦會支援到。( 有無開過價？) 我們缺的不是錢，而係錢買唔到嘅嘢，最後我同佢講，你咁多同事、行家，咁有學問，我淨係想要你啲文章，當然佢最終都無俾到我。
記：家人點睇？
楊：家人一開始好擔心，三、四年前親友都好反對，而家佢地只會話：你做就唔緊要，注意下健康，多啲休息！再後來佢地會同我講，呢單野你試下咁樣做，有學者講過呢種意見，可能咁做會好啲⋯⋯你見到成個環境唔同晒！佢哋會醒你，交流下政治觀既睇法，一步步咁轉變，我覺得都好特別。
記：那太太呢？
楊：她一直無反對過，默默支持我。當我放咁多時間係社會事務，等於佢更加辛苦，要用更多時間照顧家人。大家平時見到面都會討論社會嘅事、工會嘅事，真係無乜人可以咁支持我！佢又要照顧小朋友、睇住成頭家，都可以抽時間俾意見你，我覺得真係一個超級無敵大嘅支持！
年初老闆史提芬永利訪澳，楊晚亭照樣遞紙牌。他自言暫時還未擔心搞工運被炒。
如果可以重來⋯⋯
記：如果有得選擇，唔做賭場你想做咩？
楊：以前我有好多鬼五馬六嘅想法，有想過做廚師、音樂創作、職業電子競技，甚至證券投資我都識少少⋯⋯
記：最後放棄夢想，係咪因為人工問題？
楊：人工多少都係一個問題，因為生活壓迫得太緊要。如果樓價唔係壓到人透唔到氣，我相信好多人都會選擇轉行。但係而家無辦法，只可以繼續落去。連創業機會都無嘅時候，只可以原地踏步。前幾年樓市未咁瘋狂，仲有同事話儲幾年錢出來再創業，但而家已經無人再講呢啲。
上年紀嘅做賭場要養妻活兒、照顧小朋友，無得進修，其他行業始終人工偏低一些，為咗供樓、生活，個個焗住行呢條路，真係幾慘！後生一輩還可以繼續進修，搏下有無其他機會。
記：你放工搞工運，又無時間進修，有職都唔升，付出咁多係咪值得？
楊：好似我玩音樂，去創作、組樂隊等等，都唔可以用錢衡量。人地成日話搞工運係為錢，樣樣都錢字行頭，但我諗無一個澳門創作歌手以為可以賺到錢，個環境真係好差，完全無市場，大家只係為諗點樣唔蝕咁多？搞一場Band Show 咁辛苦都係為左嚮往個過程，我也是追求同一樣，組織一些志同道合嘅人做自己認為對的事，金錢可以買到一些虛假的感覺，但實質上好多東西金錢無法得到。
後記：
約訪期間，接連不斷的員工簽名會、打點會內大小事、傳媒訪問一個接一個，楊晚亭行程滿檔，每天只睡大約三小時。拿著大聲公在街頭吶喊，自信沉穩但不狂妄，每一步都小心翼翼籌謀，策略有進有退，並不強行硬闖，他深知每一步都關乎員工的飯碗和生計，一步也錯不得。鏡頭背後，晚亭經常都開懷大笑，豁達得很，他說希望外人不把他「神化」，吃飯睇戲有時也會犯錯，自己並非完人一個。
訪問經常被咳聲打斷，是在賭場長期吸二手煙及沒有充份休息所致。旁人或不理解，咁辛苦搞工會為咩？但見到臉書上，有毫不相識的工友會窩心地煲定羅漢果水送給工會仝人；冒雨千人集會過後，又有家人馬上開車過來，送上乾淨的衣物和暖暖的薑茶，看到這可能會明白多一點，付出這麼多，他始終害羞不肯說出口的那兩個字是甚麼。
