居琴澳人吐苦水︰犧牲好大 網民︰便宜莫貪 真係好大個坑  

6.18疫情大爆煲　即時報道

文：論盡採訪組

網址：https://aamacau.com/?p=91297

時間：2022年07月25日 15:15

有居琴澳人在網上大吐苦水表示，犧牲好大，並奉勸澳門人選擇入住橫琴前要三思。

澳門樓價高企，普遍脫離一般居民的負擔能力，再加上強大的宣傳攻勢底下，「澳門工作，橫琴居住」，成為很多澳門居民的夢想。然而，近日有自稱是「橫琴苦主」的網民分享自己在橫琴的生活經驗，引起網上熱議。該名網民指出橫琴樓價雖然比澳門低，但生活成本卻比澳門高，再加上疫情封關問題，坦言「犧牲的嘢真係唔係好值」，並奉勸有意搬去橫琴，以及打算入手「新街坊」項目的澳門人，「三思，橫琴係唔係值得你搬入去住」。

橫琴「澳門新街坊」項目預計2023年落成，項目內27棟住宅樓宇可提供約4000個單位，並設有商舖、教育、交通、醫療及社區服務中心等配套設施。

樓價平少少 生活成本高很多

該名網民的貼文一開始就表示︰「我係早期誤信政府的宣傳搬咗去橫琴居住的苦主！」並指，橫琴樓價比澳門「唔係平好多」，但出入都要用私家車，每個月油費要接近2,000元，再加上內地保險加驗車，每年支出又多6,000元，而私家車在澳門的泊車費又是一個支出。

該名網民又指，橫琴生活成本並不低，很多居住橫琴的澳門人經常要去石排灣購物，通關時又要遮遮掩掩，生怕被海關執走，而最致命的是在內地聘請家傭「貴到離晒地」。有留言反映，內地家傭月薪是6,500元人民幣起跳。

而且入住橫琴之後，每日通勤時間比澳門一個半至兩個小時，小朋友上學要朝早六點九出門，早前有「走水」問題，要再提早15分鐘出門，因為要預留時間給海關「驗屍咁查車」，到下午六點半接載小朋友回家，往往要晚上八點後才能到家。遇上節假日，單牌車會迫爆關口，變相無得出門。

封關似走難 澳門政府是擺設？

而最致命的是封關，當疫情來襲時候，第一時間是把家裡常用的物資打包「好似走難咁」，要麽在留橫琴放棄工作，要麽就舉家在澳門住酒店。該名網民表示︰「我唔求政府對我地住橫琴呢班澳門人有咩援助，澳門高官們你地唔係有份共管橫琴？點解其實都講到橫琴係有條件封關管理，係唔係有條件澳門和橫琴免隔離咁通關呢？還是你地所謂的共管根本只有大陸話事？你地只係一個擺設？」

去年年底，有廿多名購買了橫琴灝怡財富中心發展項目的澳門市民，到橫琴發展商售樓部抗議所買物業無法如期收樓。

網民︰便宜莫貪 真係好大個坑

有關貼文引起網上熱議，不少在橫琴居住的澳門人紛紛表示認同，並指今輪疫情至今一直住在澳門這邊酒店，卻又遇上停工停市，返回橫琴又要隔離而且未必搶到，現時有家歸不得，實在前退兩難。有網民表示，自己在橫琴住了兩年，最後選擇返澳居住，「經歷話我知 所謂後花園真係得談笑」。

部分市民表示︰「記住一句話：便宜莫貪」，「平買貴住的真實故事」，「最慘係賣返出黎都無人會買橫琴二手樓，真係好大個坑」，「搬返大陸住，就應該係大陸工作，小朋友係大陸讀書」，「丫媽.教落、係邊到搵食、就係邊到買樓！寧願係澳門住豆腐潤咁細嘅唐樓、都唔會上去大陸買樓！」「一個疫情將吹捧咗十年嘅大灣區照妖鏡咁還原。」

其他精選留言摘錄︰

「以後分分鐘搞到住國內嘅澳門人連回澳就業都有困難。睇CV時，一見你住大陸，擔心以後封關影響工作，可能就不請你了。」

「橫琴樓係2014年開始已經係一個局。好彩冇投資買果度，我留係澳門買了唐樓三房二廳都好過買橫琴新樓。雖然係唐樓，但都大間，住得舒服。而家唔洗供（舊年供完）舒服曬，返工又近屋企，行路得了。」

「共管已經係一大笑話,，你有冇見過一間公司可以有两個CEO呀，你覺得澳門政府會夠廣東省大聲嗎？澳門一向的角色就只係負責科水上去。」

「我一家大細焗撚住返澳住，我依家都係長租酒店，慘無人道。」

「買左7年，當初以為真係單牌两地一檢甚至封岛一體化，結果因為有小朋友考慮教育吾搬過去。我諗等我小朋友讀大學我又退休先可以住過去。橫琴超市物價，國貨同澳門差不多，而進口貨比澳貴選擇少。」

傳送門︰https://bit.ly/3vfGLbk