社會文化司司長歐陽瑜
《澳門青年政策（2021-2030）》公開諮詢較早前已結束，不少意見質疑文本中以「審辨思維」取替原政策所強調「批判思維」，是意圖磨滅青少年 「棱角」，削減其獨立思考和批判的能力。教青局青年廳廳長張敏輝回應質疑時指，無需太過膠著在用詞方面，局方對諮詢期間收到的意見持開放態度。社會文化司司長歐陽瑜昨（20）被問及該議題時，與現場記者展開一場「短版」批判VS 審辨的辯論。
以下為記者同司長之間的問與答
記者：教青局之前表示會考慮用「批判思維」或「審辨思維」，請問最後決定如何？
司長：據我了解，教青局認為批判性思維會係比較負面嘅，我哋真係希望而家的年輕人佢哋嘅諗法要批判嘅思想，但都應係正面嘅思想。
記者：批評只能講正面嘅嘢？
司長：當然唔會啦。
記者：可否解釋清楚少少呀？
司長：我舉例，有啲事情唔係為咗評批而批評，係應該對社會，佢做得唔好嘅地方有啲乜嘢建議，應該係有咁樣嘅思想。
記者：即係無建議就唔可以批評？
司長：即學生學會正面同反面的思想，咁你鬧咗之後覺得邊一樣嘢係好嘅呢？應該係要有咁樣嘅建議囉。
記者：講歷史、天安門事件，咁青少年點樣可以批判咁睇事件？
司長：對於一事件，都要了解事件嘅事實先。
記者：如何使澳門青少年「正面」咁理解六四事件？
司長：都係要了解一個歷史嘅事實
記者：係唔可以批判六四？
司長：都係我頭先講嘅。
記者：咁歷史嘅事實係乜？
司長：我而家唔係上歷史課，唔好意思呀。
記者：司長你所謂嘅正面同負面係乜？
司長：正面我自己嘅理解可以咁講啦，對政府嚟講，你要批評，若不停係一種謾罵嘅，其實係網上我哋都見到很多係呢一啲，咁你覺得正面定負面呢？大家都可以諗到。但係呢對一啲唔好嘅地方正如我喺立法會咁講，若做得唔好嘅，大家真係要批評、要鬧，但係做得好嘅地方都係需要大家知道，承認我哋同事做得好嘅地方，咁樣我哋嘅同事先可以有改善嘅空間，可以有動力不停咁進步，我相信社會亦都係其實一樣嘅。
