(資料圖片)
澳門賀特首早前透露，將會「研究」增加澳門立法會議席數量，但賀同時提醒，香港七百萬人口都只有七十席，澳門人口約香港十份一已經有三十三席，睇落澳門已經好多議席。咁啱我最近搵學術文獻時發現，一個議會對應選民人數有幾多個議席，幾多先算多，幾多先算少，係有模型可以參考。如果簡單將人口除議席數目，澳門睇落梗係會「過多」。
關於議會議席數目同選民人口嘅關係，最經典嘅模型叫做「立方根規則」（cube law），有學者統計多個地方嘅選舉數據後，發現議會議席數目都咁啱好接近投票人口嘅立方根。之後，學者Rein Taagepera，基於同一套理論再去優化模型，得出公式
，當中V 係已登記／合資格選民人數，S係議席數目。儘管選舉制度各異，將各地選民人數同議會議席數目代入前述公式，得出嘅 n比例都會接近3。由於論文資料主要用歐美數據同埋比較舊，我自己搵咗近年亞洲嘅數據測試吓：用2017年日本選舉嘅資料，日本眾議院嘅n比例係 3.0087；用2020年南韓選舉資料，南韓國會嘅n比例係 3.0856；用台灣2020選舉資料，台灣立法院n 比例係 3.5487。
學者Taagepera進一步調整對立方根規則同相關模式嘅解釋，前述公式得出比例n 值會「因國而異」，即係話，同一國家之內唔同地區、層級議會議席數目，得出比例n值都會趨向一致。基於呢個假設，可以分別計出香港同澳門有資格投票人口相對立法會議席比例n值，睇吓澳門議席數目比香港過多定過少。
由於有關模型只適用直選，所以我只能夠討論透過直選產生嘅議席數字。香港立法會直選議席共有40席（地區直選加超級區議會議席），2019年香港已登記選民人口係 4,132,977，套入前述公式，比例n 值係 4.13。澳門立法會直選議席有14席，2019登記選民人口係 310,400，比例n 值係 4.79。即係話，對比香港，澳門嘅直選議席過少。
咁澳門立法會要有幾多議席，先夠代表澳門嘅選民人口呢？如果以香港水平作參考，澳門立法會要接近香港立法會嘅比例n值，澳門嘅直選議席要增加至21席。如果用經典立方根計法，更需要加至67席（直觀上又睇落太多，未必切合實際）。
但無論如何，中國當前政治局勢一切講求圍繞習總書記集中領導，難容改革、異議聲音。任何人喺香港、澳門參與政治體制要符合可任由官方延伸解讀嘅「愛國」前設。香港亦已唔存在真選舉，恐怕短時間內討論澳門政制改革或者港澳選舉制度比較都係嘥氣。
參考文獻：
Taagepera, R. (1986). Reformulating the cube law for proportional representation elections. The American Political Science Review, 489-504.
