桃花崗地權案歷時八年，終審法院於2017年3月裁定小販們敗訴。
桃花崗小販們四出諮詢多個法律意見後，接受了發展商羅盛宗的和解方案，於今年7月遷出桃花崗。
2018年6月30日，桃花崗的晶記餅家、德姐成衣、彭記大排檔光榮結業。桃花崗地權案歷時八年，終審法院於2017年3月裁定小販們敗訴。桃花崗小販們四出諮詢多個法律意見後，接受了發展商羅盛宗的和解方案，於今年7月遷出桃花崗。
臨別依依，對於桃花崗，每人心底都有一段回憶，一番說話……
晶記 老闆娘 歐太太
「（桃花崗晶記）七〇年開嘅，開嗰陣時呢條街好旺，好多人行，有咖啡檔呀，有艇仔粥呀，豬腸粉呀，好旺，一到下午三點鐘呢，嗰啲製衣廠工人、泥水佬全部嚟嗰度飲咖啡，旺極一時。」
「而家冇喇……自從那個地產商搞嘢嗰陣，就搞到零星落索。我哋已經做咗四十幾年，好唔捨得。」
「無奈呀，真係無奈……」
左至右：晶記老闆歐生、晶記老闆娘、晶記第二代、鄭師傅。
晶記 老闆 歐先生
「我入過炮竹廠。背後呢間就係炮竹廠，廣泰隆嚟㗎，澳門最多炮竹廠。」「唉！社會變㗎嘛！我望望下冇乜出色，咪走囉！冇學師㗎，坦白講，我對眼睇到嘅嘢（餅）我就知㗎喇。」
「係唔捨得都冇辦法。『天下無不散之筵席』，就是這句。」
「已成大局，無謂鬥落去啦。」
晶記 少東 歐先生
「細細個都係（幫開手），見慣咗。本身諗住讀關於電腦啲課程之類，後來返咗去舖頭做，做開咪繼續做囉。」「冇咩點解嘅。一來見慣咗，習慣咗，同埋好似唔做又好嘥咁樣囉，咁多年歷史。」
「都冇辦法架喇，啲嘢定咗，留喺記憶入面囉。」
「最唔捨得師傅，做咗咁耐。」
晶記 餅師 鄭師傅
「我退休喇。六十幾，退休喇。」
「83年左右入行，86年左右開始喺晶記，到而家㗎喇。」點解一直在晶記？「打工度度都係咁打，老闆又好，由得我自由發揮。」
「隻隻餅都鐘意食。金錢餅啦…鹹切酥、雞仔餅，最鐘意㗎喇。嗱，請塊你食吓。」
「唔捨得係唔捨得啲客。」「啲媽咪捧住個BB，而家都結曬婚，又一代。」
「多謝街坊捧場晶記。」
晶記 餅師 鄭師傅
彭記大排檔 老闆 大哥雄
「幾多老友今朝（6月30日）嚟探我。我自己覺得……對佢哋唔住，冇服務佢哋到最後，我對佢哋唔住。」
「佢（客人）都冇得嚟幫襯，冇得食咯，冇得嚟探吓阿叔咯。最多（一齊）去飲茶、講電話，冇得喺度坐，冇得叫吓Uncle咯，咁點搞呀？捨得就唔捨得……幾十年……三十幾年喺度，何來捨得丫。任何一個人都唔捨得。」
「我哋真係唔捨得呢度，幾十年。」「多謝街坊幾十年幫襯我，關照我，開開心心過咗幾十年。多謝你哋。」
彭記與王先生（右二）合影。
珠海遊客 王先生
「次次嚟都嚟呢度食嘢，嚟呢度飲咖啡，四、五年前開始嚟，嚟親澳門我都要搵大哥雄，都要過嚟飲返杯咖啡。」點解咁鐘意？「大家坐埋一齊傾吓偈，吹吓水，冇咩約束，大家坐櫈仔咁樣。」
「第時過澳門都唔知去邊度。我嚟親，第一站肯定係大哥雄呢度。」
布販德姐。
布販 德姐
「好無奈，不過算啦，我都做咗五十七年喇。」
「諗過政府可以用呢度做啲公共設施，車位呀、老人設施，不過呢啲都成泡影啦，係『發噏瘋』，希望啲地產商有良心啲啦，價錢唔好咁貴賣畀啲市民。」
「多謝街坊支持，佢哋真係好有心。」
你又想對桃花崗說甚麼？
你又想對桃花崗說甚麼？
