「澳門論壇」探討政府應否再出招調控樓市。有市民認為，供應不足，政府出招無助壓抑樓價。「出招只會令到買家更加難買樓，業主更加唔想放盤。點解啲樓價咁貴，就係因為供應唔夠，政府咁多年有無作為？萬九公屋到依家都未找到數，收到的閒置地有無拍賣再去起樓呢？供應唔夠，樓價點會跌呢？所以，樓價不斷上升，係因為政府不作為。」
經濟學會理事劉建豪稱，出招是好是壞很難講，可能反令樓價上升；收緊按揭成數亦可能令年青人更難上樓。至於應否推空置稅或累進稅，劉建豪稱「空置」難定義；累進稅若太嚴可能影響營商環境，太輕作用不大，認為是「兩面不討好」的想法。
他補充說，回歸之後，政府興建大量公屋，「唔係無做嘢，只係未分配出嚟，或分配未合理啫。政府在房屋政策上，新城填海會有好多土地建公屋，政府真係做到好多嘢。但點樣分配就未知道，所以，唔可以絕對怪政府。係有做到，只係唔符合市民的要求。」
傳新澳門協會副理事長甄慶悅則認同政府推出有效招數，令房屋回歸居住而非炒賣之用，若政府不出招，反而不負責任。他認同政府應推出空置稅、累進稅等措施，讓政府多一種手段調控樓市，否則只能任由樓市不斷飆升。有意見質疑有關措施難定義亦難實行。甄慶悅表示，任何稅務都一樣，只要對象是人就總會有人走法律罅，「政府派錢好容易，要從市民或商人身上收稅永遠都係困難。因為定義難就舉高雙手乜都唔做，係不負責任的行為。」
有意見建議政府應優惠年輕人首次置業，這樣政府就可以無需興建大量公屋，亦無需規劃，可以節省好多工序和成本。甄慶悅則不認同，他說，如果貿然放寬按揭成數，上到樓未必是受惠者。「突然增加大量需求，可能買貴咗一、二成，係講緊1百幾十萬的債務，而且供多四、五年，我覺得買貴咗，供長咗，係受害者多過受惠者。」
他認為，政府調控樓需要多管齊下，要有長遠規劃，穩定供應，短期亦要出招打擊，否則樓價上升到任何人都負擔不起的地步，澳門就會萬劫不復。「青創又好，年輕人向上流動又好，全部都係假的口號，講咩大灣區，世界旅遊休閒中心，美食之都等等，中小企全部俾租金都已經搞死曬啦，年青人上唔到樓，淨係掛住入政府工，唔夠膽出黎冒險創業，唔夠膽為自己的理想奮鬥，令到整個社會都失去活力。」
地產業總商會副會長梁明輝則稱，地產中介亦不希望樓價瘋狂飆升，「業界最希望有成交，平貴我哋都做。」但他認為，政府出招可能牽連很多行業，希望政府有周全計劃，「唔好搵啲外行人去諗，政府要審慎。唔好只睇住一個階層或一兩個個案去做嘢。」他稱，現時澳門地產市場的炒家已經近乎絕跡，「一買樓就鎖2年，外地人買樓又要俾多一成。基本上，外地投資者對澳門市場無乜意。」他又批評，政府沒有諮詢業界意見，是歧視地產中介行業，「將所有唔好既嘢，炒貴樓，囤積都賴曬我哋，令到市民用有色眼鏡睇我哋。我去飲茶，接放學，都唔敢認係做地產中介。」
