【#小金庫系列】 近年政府豪砸大筆預算搞節慶活動拼旅遊，光是旅遊局的煙花節、光影節，去年已花了4400萬。民間也有大堆乜節物節，對市民和遊客有無吸引力就見仁見智，但政府已經靜靜預埋市民一份，預埋你俾一份錢。
翻查政府公報，#澳門基金會 每年資助不少類似節慶活動，金額高得嚇人，去年媽祖文化節獲批高達850萬，最近因巴拿馬文件知名度激增的全國政協常委顏延齡正是澳門中華媽祖基金會主席。提到澳門的節，不得不提歷史最悠久的觀光塔美食節，近年被市民踩台，一年比一年差，價錢媲美星級酒店。但你有你鬧，澳門基金會資助一年比一年多，由早年的4、500萬左右，去年更急升至900萬。
《2015年部分資助金額》
美食節 900萬
購物節 567萬
媽祖文化旅遊節 850萬
國際文化美食節 650萬
各區消費嘉年華 1千萬
身兼行政立法兩會成員、佳景集團大老闆、美食節籌委會主席的陳澤武去年坦承獲得政府1千萬資助，又大呻成本好高其實賺唔到錢，之後被網民連番吐槽，揶揄「點解要政府包底？唔賺錢不如唔好搞啦」、「還番公共地方俾市民」，有心水清的市民說到重點：要公開盤數！
但「依法」無論活動主辦方還是社團，無論拿了幾多個億、幾多千萬，受資助團體只須向基金會交數，賺蝕根本無人知。美食節號稱原意是幫本地中、小、微企做生意，但有商戶向我們透露美食節入場費很高，申請亦未必批，好視乎有無「關係」才能進場。而無錢無人手無緣進場既舊區食店，每年美食節期間都大嘆生意差了很多。
可能見美食節辦得很成功，2009年起澳門又多了一個由澳門繁榮促進會辦的「國際文化美食節」，之後改由澳門旅遊零售服務業總商會主辦，話事人都係勵駿集團行政總裁周錦輝，而舉辦地點當然是旗下的漁人碼頭。雖然有食店稱入場唔使錢，但辦活動搞旺自己個場，為何不是商人自家出錢，反而要澳門基金會連年批出650萬資助？市民可能要大嘆一句：真坑爹！
澳基會的掩眼法
其實類似用公家錢搞XX節、XX慶典、娛樂週，表面推動旅遊，實質商人才是最大得益者的例子多不勝數，本文只是翻查其中涉及大額資助的活動，有興趣的市民可以自行查閱政府公報。沒錯，基金會並無隱瞞，資助「大多」有登公報，但都是在「批出後」，覆水難收，即是市民嘈都無用。而且，超大額資助的刊登方式一般都是分開幾期「斬件碎上」，例如：2014年美食節最後一期撥款是在2年後、2016年2月3日才刊登公報，真係未到最後一刻都未知個氹有幾深。
相對而言，基金會係透明度方面已經做得好好，不少部門批出的資助根本毫無痕跡，例如美食節和最近黃鴨訪澳，旅遊局都有科水，但政府公報都無顯示，又係一句「依法」唔使公開。
這種「官商合作」模式在澳門多年來運作暢順，已變成一種根深蒂固的機制，無孔不入。除了澳基金、政府部門，按功能分類政府各個基金會都是一大水源，其中工商業發展基金就是一個好例子。以去年購物節為例，在澳基會獲得450萬資助，表面看比前幾年批少左，並非澳門政府「財政緊縮」要慳番啲，查實係另一條水，工商基金又批番百幾萬，加埋567萬比往年還要多，跑贏通脹，至於其他部門有無科水暫時不得而知，因為「依法」政府根本唔使向市民交待。
揭開工商基金又是一個寶藏，大堆以刺激內需為名的「消費嘉年華」、「感受澳門」系列活動，全部外判予各區商會主辦，光是去年已花了超過1千萬。其中由澳門中南區工商聯會主辦的《歡樂澳門街。玩轉中南區》就獲批427萬，其他少則也有200幾萬。政府不斷派，難怪整個城市都倍感歡樂和幸福。
【獨立發聲，深入報道，支持我們走下去】
X
請將捐款存入《論盡》之永亨銀行澳門幣戶口
用戶名稱：「訊藝有限公司」
帳戶號碼：699070-100
捐款、義工招募
https://aamacau.com/donation
【#小金庫系列】
左手交右手
遊艇汽車公務機展 工商基金包7300萬
https://goo.gl/aaqunf
以「文創」之名
日防夜防──澳門人失去的，何止區區一億？！
https://goo.gl/F3qZtR
【延伸閱讀】
肅貪三大漏洞 澳府貪官醜聞浪接浪
https://goo.gl/wrhx4E
公共採購未止血先放寬招標門檻
吳國昌：特首財政司要負責
http://goo.gl/MeD2O7
向記者施壓 傳協譴責黑手干預暨大報道
https://goo.gl/5pPgyh
