澳門博彩業的蓬勃發展，為政府帶來每年逾千億的財政收入。然而，對於各種民生問題，政府卻往往束手無策，令市民的怨氣與日俱。為何澳門這樣一個小城市，要解決民怨的問題卻如此困難呢？時事評論員蘇文欣說︰「因為政府唔捨得去用嗰啲錢，因為政府唔識得去用嗰啲錢。」
澳門政府，你醜唔醜？
蘇文欣指出，澳門與阿拉伯國家有很相似的地方。同樣是產業單一：阿拉伯國家依靠石油，澳門依靠博彩業，彼此都以單一的產業帶來巨大的財富，「大家都知有一日會玩完」。他說︰「花無百日紅，油無千日上」，開採石油總有枯竭的一天，因此，這些國家致力使自己變得多元化，在教育、醫療、社會福利等投放大量資源。他說︰「美國、英國最叻既教授，未曾被阿拉伯國家請過去，叻極都有限，就係咁簡單。我聽到你最勁嗰啲就請嗰啲，錢咋嘛！佢地既教育淨係呢啲已經夠啦，我地澳門有無學到人呢啲嘢啊？唔使諗啦。」
同樣是富庶之地，經濟數據光鮮亮麗，阿拉伯國家是取之於民，用之於民，然而，澳門市民卻感覺到越來越大生活壓力。高樓價、高通脹、交通擠塞，醫療系統千瘡百孔，社會資源得不到公正的二次分配，弱勢群體得不到幫助，「澳門人，尤其是舊區的居民，佢地真係有貧窮的感覺」，蘇文欣說，澳門居民即使完全沒有收入，亦可以有三、四千元的經濟援助等津貼；無屋住，可以申請社屋。「佢地係咪唔可以生存呢？唔係，佢係絕對可以生存。」然而，將這些人的生活狀況與澳門排行全球第四的人均GDP作對照，蘇文欣說︰「其實我地應該要問一句說話：『澳門政府，你醜唔醜？』」
澳門政府的「鴉片哲學」
蘇文欣續說︰「澳門政府係有好多錢但唔識用！我哋用一啲好傳統的管理金錢的方法，就係我阿爺個一代清朝人管理錢既方法︰錢放喺袋，唔攞出來投資。將啲錢儲起，而不是投資在子女身上，可以留低啲錢俾子女，但唔係投資。」
他反問記者︰「咁嗰陣點樣將啲錢繼續留在家庭裡邊？答案是教你食鴉片，呢個係當時既哲學，唔係講笑。」為什麼呢？「因為嫖、賭會傾家蕩產。吹就唔怕，食得幾多？所以，中國清朝富有的大家庭，子女唔係咁叻，又無國際視野，佢哋係用呢個方法去教仔。」
蘇文欣認為，澳門政府這套管治哲學是「樣樣嘢都有，餓你唔死。」卻不願意向市民在醫療、教育、社會保障等方面投放資源，當市民為經濟發展所帶來的各種民生問題感覺到「痛」的時候，就每年派現金分享當作「止痛劑」。歸根究底，是澳門政府沒有現代思維去管理財富分配。
商業理財充當財政政策
蘇文欣認為，澳門政府一直以來都用商業銀行的「理財方式」充當地方政府的「財政政策」，「當佢哋睇唔到有即時的回報，佢哋地就唔願意做。路氹城係即刻回報架嘛。賭場開張第一個月就有收入架嘛。你諗下，政府去北區搞完啲馬路可以有啲咩？」
然而，政府有責任公正地處理財富的二次分配，但二次分配不能夠收到即時的成效，或者直接增加財富收入，因此，亦得不到政府重視。蘇文欣說，二次分配要做很多社會福利的工作，例如減低人們的犯罪率，可能未能夠看到財富的直接增加，但已經減少其他方面的支出，「唔使咁多社工，唔使咁多警察」。這需要一段長時間才能慢慢成為金錢的收入。然而，「我們的政府，就只是想投資落去就即刻攞返，嗰個係直接既投資，然後分散財富。」
