新聞自由，言論自由，從來就不應該有地域性的限制。澳廣視高層最近「大地震」，其新聞部前線記者一連向公眾發三封公開信，要求新聞自由，做到真正的編採自主。鄰埠香港上週日更有六千人參加「反滅聲」遊行，當中亦有本澳新聞業界代表及市民參與，港澳共同「企硬反滅聲 撐言論自由」。港澳新聞界的關係更是唇亡齒寒，彼此守望。
因不滿自我審查而請辭的前澳廣視記者陳麗靜，代表澳門傳協前往香港參與遊行。她在集會中指出，澳門的傳媒是一個「無乜人關注嘅行業」，沒有什麼人會關注新聞界所面臨的問題。她認為李慧玲雖然受到迫害，然而卻是幸福的，「因為香港仍然有好多人係關注呢個事情，仍然係支持你，仍然係相信講真話會係有好報。」
新聞自由事關你我
陳麗靜認為，新聞自由並非只是業界的事情，「新聞自由，其實係一啲都唔離地嘅，係同我地嘅生活好有直接嘅關係。」她認為，新聞自由就是「放心說話，真心相信，做新聞嘅人可以唔需要去顧慮，佢要去講真話，佢要去寫事實，佢唔需要去擔心會被秋後算帳，可以做好自己的本份；看新聞的市民可以放心相信自己所看的新聞，全部內容是事實，呢個就喺我理解嘅新聞自由。」
陳麗靜擔憂沒有新聞自由的後果將會影響下一代，「如果真係有呢一日，我覺得係一件好得人驚嘅事情。原來我地無一個可以肯定地去相信嘅消息來源，我地嘅下一代點樣去認識我地嘅歷史。」
陳麗靜認為，香港人了解澳門的情況不多，「對澳門嘅認識不外乎係澳門政府會派幾多錢」。然而，更多一點的情況已經「答唔出」。她說︰「呢個正正就係澳門嘅當權者同既得利益者之所以能永久立於不敗之地嘅原因，因為消息只係封鎖係內銷，香港咁近嘅地方一啲都唔知道。」
澳門傳協代表陳麗靜
本澳傳媒自我審查情況普遍
她指出，本澳傳媒自我審查很容易，「閂埋門我點樣斬你條稿都無問題。因為其他媒體係無辦法去插手。點解？因為媒體細，原來你媒體個老闆同我媒體個老闆係friend底，即係又唔報得啦。之後，係自己嘅員工更加唔夠膽報啦。你係咪想無運行啊？」
她又認為，記者不是聖人，記者亦會犯錯，但是「請你用事實用證據去說服我地，我地係錯咗。而唔係去滅聲去收聲。」
另外，本澳留港畢業生「馬留」亦有參與今次遊行。他認為，今次的集會的人數雖然沒有七一遊行多，但是亦可以看出每名參與者都有一個強烈的信念︰「求嘅唔系一件重大嘅福利，而只係一個講出事實嘅良心。」他指出，前年「鷺鳥林事件」正正體現出新聞自由的重要性，否則市民就不會知道「澳門八景」正受到前所未有的威脅。他說︰「作為一個負責任的成年人，我唔想下一代睇報紙嘅時候，分唔到什麼是真，什麼是假。
