即時報道
即時資訊、特別報道、即時評論。

議員冀循步漸進推民主達普選 「擦亮」一國兩制招牌 特首:主導權在中央

即時報道

文:記者小聚

時間:2021年04月13日 22:22

在立法會主席高開賢陪同特首賀一誠(前)進入立法會議地下會議室時各議員起立。

直選議員蘇嘉豪及區錦新關注民主政制發展,希望今屆政府能循步漸進推動民主,最後達至普選,以 「擦亮」「一國兩制」這招牌。 特首賀一誠在回應時表示,政府暫時沒有計劃向中央提出相關要求,強調政制改革主導權在中央,「唔喺我呢度,唔喺我呢度,澳門係冇呢個主導權話我哋要求點樣改,我地要求普選就普選,而家係冇咗呢個方面」。

賀一誠在出席今日(13)立法會大會時表示,政改需要有社會共識,「唔係拍吓腦袋,我話得就得」,先取得社會共識先可以進行。

蘇嘉豪以最近議會一次過否決9份辯論動議為例認為立法會根本不能代表民意,「官委及間選議員成為了最大嘅反對派,一人一票選出嚟嘅直選議員喺立法會都只係佔四成」;又指,連續三屆立法會的直選議席都沒有改變。「喺你任內有冇可能、有無條件向中央提出繼續推進議會嘅民主化,最低限度直選嘅議席比例超過一半,最後邁向普選?」

另一直選議員區錦新亦認為澳門的民主政制需循步漸進。他指出根據《澳門基本法》附件一及二規定,兩選舉法是否需要進行修改,行政長官應向全國人民代表大會常務委員會提供報告才可以啟動相關程序。「呢個報告係交定係唔交,或者點樣改,都唔係行政長官拍下腦袋就決定」。區又稱,政府應該要先進行公開諮詢收集市民意見,在民意基礎上草擬成報告再向人大常委提交,「一切都唔係咩都唔做就可以實現㗎。」

區錦新又表示,國家正處於內外交困時期,澳門應該發揮國家所需、本地所長的作用。「國家所需嘅係乜嘢呢?經過香港嘅風波,唔少國家都質疑中國推行一國兩制嘅誠意,我們所長係乜嘢呢?多位國家領導人都讚揚澳門係『一國兩制』嘅典範。 如果我可以循步漸進推行民主,行政長官同埋立法會亦都逐步邁向普選,即說明『一国兩制』同現代文明、民主並無衝突,所以推動澳門民主進步,無疑係咪一個兩制擦亮招牌」。他又稱,行政長官應該為發揮澳門所長以為國家所需,在推動澳門民主進步有所承擔。

回應民主進程方面,賀一誠又表示,中央提出貫徹「愛國者治澳」的方針,「我哋都係睇到呢個問題,下一步應該點樣做呢?主導權係中央,唔係我呢度,唔係我呢度」。「附件係咁寫,但係主導權都係中央嘅,我哋一定好清楚。」至於是否要進行公開諮詢,政府需有全盤考慮,強調目前未有打算,但承諾會反映區所提出的意見。

 賀:議會工作十年 「冇話過立法會有反對派」

回應蘇嘉豪所指在否決辯論動議時官委及間選議員則變成議會最大的反對派時,賀一誠表示,議會的議員都是社會精英,投票時一定按自己的意願,並非投反對票就是反對派。又指,自己過去十年做議會副主席及主席期間,從來沒有認為任何議員是反對派。「我坐喺呢度(議會)10年啦,我坐呢個位(立法會主席)都六年⋯⋯冇認為邊一個係反對派,到而家我冇話立法會有反對派⋯⋯我有冇講過你(蘇)係反對派?我冇講過呢句話、冇呢個定義。」