2021-01-29 澳門老味道每週專題
有位受訪者表示,相對其他可用不同媒介記錄的感覺,如視覺及聽覺,味覺一旦失去即代表永久逝去,因其難以言喻。而面對近年越來越多本地老店結業,我們挽留的方式也只是在它「最後日子」大排長龍以視珍而重之。有人說,「如果早啲幫襯就唔使執笠啦」,可是這樣就真的留得住嗎? 然而,我們可能未曾想過這些老店其實也是城市發展的見證和縮影,手藝的傳承、店址的變遷、味道的改革等等,此謂真正屬於澳門的味道。一間又一間落下帷幕、光榮結業,感歎一句「夕陽無限好,只是近黃昏」。日後,又是誰來告訴我什麼是澳門味道,又是誰可烹調出那熟悉的味道呢?

梁慶記仙姐:即使冇生意 見下街坊打下招呼都開心

2021-01-29 澳門老味道每週專題

文:記者小聚

時間:2021年01月30日 10:10

老食店梁慶記餐牌

梁慶記已有八十年歷史,仙姐是掌舵人,但她喜歡被稱呼為「麵姐」,笑稱是因為賣了幾十年麵食,街坊都知道她是賣麵的。「條街個個認識,幾十年街坊,大家都叫係叫我麵姐」。年過半百的仙姐是梁慶記第三代經營者,近年來亦漸漸將經營的重擔交給兒子。「每日(開舖)可以見到街坊,打下招呼都覺得好開心。」

她表示,不知不覺間自己已在店裡工作數十年。「捱過四十年了,以前條街真係好有人情味,街坊都做生意,有賣生果、糖水,相互幫襯,好有人情味。即使(有時)冇生意,見到到街坊,打下招呼都開心。 」

與本地其他麵食老店惺惺相惜

八十年老字號梁慶記以傳統手打竹昇麵出名,但仙姐表示可能不止80年,「成百年歷史都有囉⋯⋯我老爺嘅老豆做落囉。以前六記嘅老豆都同梁慶記一齊出身囉。」又指,連九十多歲的姑奶都是在十月初五街的街邊檔慢慢捱出身。

仙姐的麵檔放著大大的手寫招牌「梁慶記」。她憶述,之前因為搬遷連當年的手寫招牌都束之高閣多年,但食客表示不捨得招牌,後來又掛上。

仙姐又表示,梁慶記同其他幾間麵老店如六記、巨記一直有來有往。「六記、巨記嘛,以前好好親情。以前我奶奶生日大家日都一齊聚呀,以前好有人情味。依家都有,同六記都有聚下餐、聯絡下。巨記都有打下招呼,相約。」

梁慶記的手寫招牌頗有歷史韻味。

不少城中名人光顧 食的是懷舊

城中教育工作者尹君樂及前立法會議員關翠杏都是座上客,喜歡舖頭懷舊食物。「校長都睇住我哋大啦,關翠杏都食到大,知道(這裡)懷舊。」仙姐又指,不少街坊都是舖頭熟客,「街坊鍾意呢種口味就自然嚟,辣椒油自己較出嚟,很多人都啱口味。有啲客食三碗雲吞麵都有呀,一餐食百幾蚊,都係熟客。」

仙姐表示,不少生客來過一次就愛上。「一坐低就知道邊啲係生客,生客嚟到左望右望,左撩右撩,我咪話鍾意咪試下囉,但一試過就鍾意。個個客都要求唔同,米芝蓮都係啲客畀㗎,佢哋嘅支持。」原來梁慶記曾獲2019、2020及2021米芝蓮推介。

問及見到有老店結業會擔心舖頭將來也如此,仙姐亦只話「順其自然」,幸好有兒子肯「落手落力」幫忙。「無話擔唔擔心呀,順其自然。小販擺街邊,有得做咪做,冇得做唔強求囉⋯⋯最緊要身體健康。後生嘅幫你咪有得做囉,唔幫你點做呀?點樣捱呀?」

梁慶記擺攤於鬧市角落。

特色街邊檔難受惠政府扶持措施

現時牌照仍在仙姐名下,但她希望盡快交棒。「有兒子幫手,佢都有興趣。依家仲係我嘅牌,我仔協助我,將來畀佢做囉,」雖然有兒子肯繼承,而且亦有客源,但仙姐似對舖頭的將來發展亦未抱好大期望。

前兩次颱風引致的水浸,目前仙姐須還三十多萬貸款。「水浸時借咗三十萬,而家還緊。工場在地下,因打風水浸浸晒啲生財工具要再配置。雪櫃都浸晒,反晒。連浸兩鑊,血本無歸咁濟。」又指,未見政府有推出措施協助幫助有特色的街邊小販。「希望有人同政府反映,讓特色小販可以都受惠(政府措施),唔使咁辛苦,落雨捱落雨,搬出搬入,好辛苦,幾廿歲。」問及會否打算租地方開店,仙姐則表示以目前的情況應該都很難。