即時報道
即時資訊、特別報道、即時評論。

住屋權利似中六合彩 市民轟︰荒唐!

即時報道

文:論盡採訪組

時間:2015年10月18日 20:20

IMG_5597

參與今次經屋大遊行的不少是已有物業的人士,但不滿現行經屋制度令澳門生活淒涼。「住屋係好基本的權利,點解要搞到好似中六合彩咁?政府根本太荒唐,太不負責任」嚴女士稱,澳門樓價飆升得太離譜,一般市民根本無法負擔,但政府仍然放任,「點解政府唔壓抑樓市?澳門市民點捱啊?個個高官搵夠辭職,唔係引咎辭職。」

政府經常聲稱並非不想建公屋,無地是主因。嚴女士則反駁︰「咁多閒置土地唔收返,起豪宅就有地,起公屋就話無地,咁點啱啊?」她認為,澳門現時GDP排世界前列,但市民生活仍然淒慘,「澳門人應該唔係咁窮,應該人人有層樓,唔洗咁淒涼架!政府年年派九千蚊有乜用?我俾返九萬蚊政府,唔該幫我哋起返啲公屋!」

2015-10-18 16.04.03-1

今次一家三口出席遊行的龔太太批評,現時抽籤制度不公平,無法真正滿足有需要的人士優先上樓。「有屋住的又抽到,無屋住的卻抽唔到。完全無科學根據,好似一個遊戲,太唔認真,好唔公平。」她表示,現時一三口租住在破舊的唐樓,租金每個月仍要6,000多元,對生活造成很大負擔,希望政府盡快增建公屋,並恢復計分排序輪候制度,讓市民上樓有期。

「我咁大個人第一次出黎遊行,我平時乜嘢都唔理,乜嘢示威都唔去,淨係呢樣覺得唔可以唔企出黎。」任職賭場的何女士稱,自己家中有兩名七十多歲的老人,又有年輕人等待結婚,但上次的1,900單位亦無份。現時抽完籤就散隊,又不知政府幾時再開隊,她擔心家中兩老無機會見到「中奬」的一日。「現時私樓入手起碼要幾百萬,點樣儲到首期?出去租屋都要六七千蚊個月,唔使生活費啊?」