即時報道
即時資訊、特別報道、即時評論。

鏡湖重建物業陸續有來 馮強︰我哋上埋天堂都未做完

即時報道

文:論盡採訪組

時間:2015年10月9日 14:14

IMG_0424

鏡湖慈善會計劃收回內港物業重建高層住宅,引來坊間熱議。慈善會理事長馮志強今日再次回應時十分動氣,他指有租戶社會抹黑慈善會「迫遷」,「租客個個都話好慘,你問馮志強,我都話好窮,飯都無得食,日日鋸扒,對唔對啊?呢種咁既渲染,呢種咁既煽情,大家都識做,我諗係唔正確。」他稱,慈善會是依法通知有關租戶搬遷,若特困租戶有需要,慈善會將提供協助,經協商解決問題,不會迫遷,唯至今未有接獲租戶的求助,「一講就話我哋迫害,為富不仁,講埋啲不等使既嘢,呢個係唔公道,係對慈善會抹黑。」

有關重建項目預計純利約2億,至於這筆巨款將如何使用?他則表示,慈善會會將其儲起,亦可用於改善鏡湖醫護人員的待遇。「花無百日紅,我哋無積蓄,無儲備,點樣應付將來的問題?中國人話,積谷防飢,唔係伸大手掌問人攞。」

馮志強指出,從前有很多善長向慈善會「捐管」物業,「成條街,成條街咁送俾我哋」,有關租金由善長的後人和慈善會攤分,現時很多物業已經倒塌空置,慈善會今後仍將陸續收回物業開展重建計劃,「重建項目太多,二、三十年都做唔晒,我哋上埋天堂都未做完啊!」被問下目前有多少項目等待政府批則?「我都數不清啊,太多啦!好似面包出爐咁,一爐一爐咁出黎,要有計劃,就黎冧先搞呢啲,未冧個啲收住租先。」

他又主動透露,慈善會在十月初五街有2萬呎土地向政府入則發展,但因為溢價金要約8,000萬,只可建五層高樓宇,認為政府叫價太高,所以擱置計劃。而近期涉及慈善會的重建項目有三個,分是位於炮兵街、連勝馬路,以及鏡湖醫院興建醫務綜合大樓。